Ֆրանսիան և Չեխիան ավելացրել են Հայաստանին տրամադրվող մարդասիրական օգնության ծավալները, Ռուսաստանը՝ նվազեցրել․ վիճակագրություն

2020 թվականը տնտեսական առումով բարդ տարի էր ինչպես Հայաստանի, այնպես էլ աշխարհի մյուս երկրների համար։ Սա նաև արտահայտվել է Հայաստանին տրամադրված մարդասիրական օգնության ծավալների նվազմամբ։

2020 թվականին Հայաստանին ուղղված մարդասիրական օգնությունը կազմել է 24 մլն 551.1 հազար դոլար՝ նախորդ տարվա 110 մլն  860.5 հազար դոլարի փոխարեն։ Այսինքն, նախորդ տարվա համեմատ, մարդասիրական օգնության ծավալները շուրջ 77․9%-ով անկում են գրանցել, տեղեկանում ենք Պետական վիճակագրական ծառայության հրապարակած տվյալներից։

Առավելապես նվազել են ԵՄ երկրների կողմից Հայաստանին տրամադրվող մարդասիրական օգնության ծավալները։

Այսպես՝ եթե 2019 թվականին ԵՄ երկրների կողմից Հայաստանին տրամադրվել է 32 մլն 035.4 հազար դոլարի մարդասիրական օգնություն, ապա 2020 թվականին այն կազմել է 9 մլն  566.8 հազար դոլար՝ նվազելով շուրջ 70․1%-ով։ Նվազել են Գերմանիայից, Իսպանիայից, Նիդերլանդներից տրամադրվող մարդասիրական օգնության ծավալները։

Այնուամենայնիվ, ԵՄ որոշ երկրների կողմից Հայաստանին տրամադրվող մարդասիրական օգնության ծավալները մեծապես ավելացել են։ Ֆրանսիայի կողմից տրամադրված օգնությունը գրեթե կրկնապատկվել է՝ ավելանալով 94․5%-ով, Չեխիայի կողմից տրամադրվող մարդասիրական օգնությունն ավելացել է 2 անգամ, իսկ Իտալիայինը՝ 4․9%-ով։

Նվազել է նաև ԱՊՀ երկրների կողմից տրամադրված մարդասիրական օգնությունը՝ 67%-ով։

Մասնավորապես՝ նվազել է Ռուսաստանից եկող օգնությունը՝ 42․3%-ով, փոխարենը շուրջ 2․5 անգամ ավելացել է ԱՊՀ այլ երկրների կողմից տրամադրված մարդասիրական օգնությունը։

Էապես նվազել են նաև Միացյալ Նահանգներից (-40.8%), Շվեյցարիայից (-87.1%), Հնդկաստանից (-77․4%), Ճապոնիայից (-93.7%) Հայաստանին տրամադրած մարդասիրական օգնության ծավալները, իսկ Չինաստանից եկած օգնությունն ավելացել է 38․6%-ով։

Անժելա Պողոսյան