Երբ բուհ ընդունվելն ավելի հեշտ է, քան մանկապարտեզ. քաղաքապետարանի արձագանքը՝ ծնողների բողոքին. ՏԵՍԱՆՅՈՒԹ

Երևանում ներկայում նախադպրոցական կրթությունը ընդհատել և մանկապարտեզ չի հաճախում շուրջ 3000 երեխա, իսկ հերթագրվածների թիվը գերազանցում է 12.000-ը: Այս մասին հայտնում է Երևանի քաղաքապետարանը:

Խնդրին հնարավոր լուծում տալու նպատակով կառույցը նախաձեռնել է քննարկումներ պետական լիազոր գերատեսչությունների հետ, որոնց արդյունքում սահմանափակումները որոշակիորեն կմեղմացվեն: Երեխաների վերընդունելության կազմակերպման կարգի մասին ներկայացված է այստեղ:

Նշենք, որ նախադպրոցական ուսումնական հաստատություններում վերընդունելության և ընդունելության մասին կորոնավիրուսի համավարակի տարածման կանխարգելման նպատակով Հայաստանի Առողջապահության նախարարության նախատեսած սահմանափակումներիհամաձայն՝ 2020-2021 ուսումնական տարում Երևանի ենթակայության մանկապարտեզներում ընդունելություն չի կազմակերպվել:

Միաժամանակ,սահմանափակված է խմբերում ընդգրկված երեխաների թիվը: Հիշեցնենք՝ քաղաքապետարանի շենքի դիմաց երեկ մի խումբ ծնողներ բողոքի ակցիա էին կազմակերպել՝ մանկապարտեզներում ընդունելությունը վերսկսելու ժամկետների հարցում հստակություն պահանջելով: Կրթության փորձագետ Սերոբ Խաչատրյանի խոսքով՝ Հայաստանի անկախացումից հետոԵրևանում նախադպրոցական հաստատությունների մի շարք շինություններ վաճառվեցին, սեփականաշնորհվեցին, դարձան բնակելի կառույցներ:

Եկավ մի շրջան, երբ Հայաստանում նվազեց նախադպրոցական տարիքի երեխաների թիվը: Իսկ երբ Երևանում պետական մանկապարտեզները դարձան անվճար, դրան զուգահեռ՝ ծնելիության թիվն էլ աճեց, մանկապարտեզների թիվը սկսեց չբավականացնել երևանցի երեխաներին:

Կրթության փորձագետը կարծում է՝ ծնողների պահանջն արդարացված է, քանի որ երեխաներն այսօր լուրջ խնդրի առաջ են կանգնել: Երևանի քաղաքապետարանից տեղեկացնում են՝ 2020 թվականի ծրագրով հիմնանորոգված մանկապարտեզներն առաջիկայում կվերաբացվեն, և մանկապարտեզներում երեխաների ընդգրկվածության պատկերը դրականորեն կփոխվի:

Բացի այդ, քաղաքապետարանը շարունակում է մշտական կապ պահպանել լիազոր գերատեսչությունների հետ և, համաճարակային իրավիճակի բարելավմանը զուգընթաց,ակնկալվում են սահմանափակումների հետագա մեղմացումներ:

Մանրամասները՝ տեսանյութում։

Աննա Բաբաջանյան