Հասարակություն
08.02.2021 | 12:29Երևանի քաղաքապետարանի շենքի դիմաց մի խումբ ծնողներ այսօր՝ փետրվարի 8-ին բողոքի ակցիա են իրականացրել` պահանջելով հստակություն, թե երբ են մանկապարտեզներում վերսկսվելու ընդունելությունները: Բողոքող ծնողներից մեկը նշեց, որ մեկ տարի կարանտինային ռեժիմում սպասելով՝ ծնողները համբերել են, սակայն քաղաքապետարանը հստակ բան չի ասում:
Քաղաքապետի մամուլի քարտուղար Հակոբ Կարապետյանն ասաց, որ քաղաքապետարանը ոչ միայն տեղյակ է այդ խնդրին, այլ նաև քայլեր է ձեռնարկում՝ մանկապարտեզներում հավելյալ տեղեր ավելացնելու հետ կապված:
«Անցած տարի համավարակի պատճառով ընդունելություն չի եղել և մինչև օրս ընդունելություն չկա, ինչպես նաև մանկապարտեզներում հաճախելիության սահմանափակում է մտցվել: Երևանի քաղաքապետարանը հետևում է բացառապես Կառավարությունից եկող ցուցումներին»,- նշեց Կարապետյանը:
Նրա խոսքով՝ Երևանի քաղաքապետարանի համապատասխան ստորաբաժանումները և համակարգող փոխքաղաքապետը նախաձեռնել են քննարկումներ համապատասխան գերատեսչությունների հետ՝ այս հարցին լուծում տալու նպատակով, հասկանալով, որ բազմաթիվ աշխատող ծնողներ երեխաներին թողնելու տեղ և հնարավորություն չունեն:
Մանրամասները՝ տեսանյութում։
