Տնտեսություն
04.02.2021 | 12:04Պետական պարտքի բացարձակ թվով աճն առաջին հայացքից ընկալվում է որպես բացասական երևույթ, բայց պետք է հաշվի առնել, որ պետական պարտքի վարքագիծը հետևանք է հարկաբյուջետային քաղաքականության և պետական բյուջեի: Այս մասին կառավարության նիստում հայտարարեց ֆինանսների նախարար Ատոմ Ջանջուղազյանը:
«Պետությունը, որն իր բյուջեում ունի դեֆիցիտ, չի կարող մտածել բացարձակ թվով պարտքի նվազման մասին, որովհետև որևէ տարվա պետական բյուջեի դեֆիցիտը ֆինանսավորվում է ներգրավվող փոխառու միջոցների ճանապարհով: Միակ դեպքը, երբ կարող է քննարկվել բացարձակ թվով պարտքի նվազման հարց, այն է, երբ որ նպատակադրում արվի դեֆիցիտը հասցնել զրոյի: Բայց մենք այդպիսի քաղաքականություն չենք ունեցել, չունենք և մեծ հավանականությամբ չենք ունենա, որովհետև դա զարգացմանը նպաստող քաղաքականություն չի կարող համարվել:
Հետևաբար քանի դեռ ունենք պետական բյուջեի դեֆիցիտ, անխուսափելի է պետռական պարտքի բացարձակ մեծության աճը»,-ասաց Ջանջուղազյանը:
Նրա խոսքով՝ կա նաև պարտքի բեռի հարաբերական ցուցանիշ. «Համախառն ցուցանիշը, որն օգտագործվում է պարտքի բեռի գնահատման համար, դա պետական պարտք/ՀՆԱ հարաբերակցությունն է: Այս դեպքում բացահայտվում է, թե որ չափի բեռ է պետական պարտքը տնտեսության համար: Բազմաթիվ այլ ցուցանիշներով ներդրողները որոշումներ են կայացնում, թե որքանով է ռիսկային երկիրը:
Առայժմ Հայաստանը հիմնականում գնահատվել է նվազ պարտքի բեռ ունեցող երկիր: Բայց սա չի նշանակում, որ պետք է մտնել ռիսկերի տակ ու էապես մեծացնել պարտքը, որովհետև նույն ներդրողը գնահատում է, թե որքանով է վճարունակ երկիրը»:
Մանրամասները՝ տեսանյութում:
