Ի՞նչ կարժենան դեպի ՌԴ թռիչքի տոմսերն առաջիկա օրերին․ չվերթների առաջին օրը․ ՏԵՍԱՆՅՈՒԹ

Փետրվարի 1-ից մինչև մարտի 1-ը Հայաստանից Ռուսաստան մեկնելու համար բավարար կլինի կորոնավիրուսի թեստի՝ 72 ժամ ժամկետով բացասական արդյունքի առկայությունը։ Հունվարի 27-ին Կառավարության նիստի ժամանակ այս մասին նշեց վարչապետ Նիկոլ Փաշինյանը՝ հավելելով՝ ծրագիրը պիլոտային է։ Առաջին իսկ օրը՝ փետրվարի 1-ին, «Զվարթնոց» օդանավակայանը, վերջին ամիսների համեմատ, անսովոր մարդաշատ էր։ Դեպի Ռուսաստան այսօր նախատեսված 5 չվերթի տոմսերը վաճառված են։

Ուղևորներից Մառա Խառատյանը Մոսկվայում է բնակվում, մեկ տարի առաջ է եկել Հայաստան՝ տատիկ-պապիկին տեսության ու էլ գնալ չի կարողացել։ Ծնողները Մոսկվայում են։

Ռուզաննա Ավետիսյանի ընտանիքի մի մասը նույնպես Մոսկվայում է․ մոտ 1 տարի է՝ չեն տեսնվել։ «Գնում ենք միանանք մեր ընտանիքին։ Ամուսինս, տղաս, հարսս, թոռնիկներս էնտեղ են, ես ու փոքր տղաս էինք եկել»,- ասում է տիկին Ռուզաննան։

Իսկ Հակոբյան Մարիետան դեռ չգիտի՝ երբ կվերադառնա, կամ կվերադառնա՞, թե՞ ոչ։ Աշխատելու է գնում, ընտանիքը մնում է Հայաստանում։ Արտագնա աշխատանքի փորձ չունի։ Երկրորդ անգամ է գնում Մոսկվա․ առաջին անգամ տարիներ առաջ է եղել այնտեղ։

Ի տարբերություն տիկին Մարիետայի՝ Մանթաշից Մոսկվա մեկնողներն արտագնա աշխատանքի փորձ ունեն։ Խմբով են գնում։ «Ամեն տարի գնացել ենք, մնանք ինչ անենք, էստղ աշխատանք չկա, գյուղացի ենք, հողից բերք չենք կարող ստանալ։ Նախորդ տարի փակ էր, չգնացի, հիմա բաց է՝ գնում եմ»,-ասում են նրանք։

Ավելացնում են՝ Ամանորին գալու են՝ երեխաները, թոռները, ընտանիքը այստեղ են։

Ոչ բոլոր ուղևորներին, սակայն, հաջողվեց օդանավ հասնել։ Չվերթներից մեկի դեպքում պարզվեց՝ կորոնավիրուսի թեստի պատասխանի հետ կապված խնդիրներ կան։

Մանրամասները՝ տեսանյութում։

Իրինա Մկրտչյան