Պետք է անցնենք ռեալ գործողությունների․ ԿԳՄՍ նախարարը՝ կրթության և գիտության զարգացման մասին. ՏԵՍԱՆՅՈՒԹ

Անվտանգությունն սկսվում է կրթությունից, և դա ամենակարևոր մասն է մեր անվտանգության, որը մեր գիտակցության մեջ պետք է ձևավորվի, մեր միտքը պետք է լինի անվտանգ, մեր գիտակցությունը չպետք է վտանգված լինի: Այս մասին ԱԺ-ում «Գիտությունը՝ որպես անվտանգության և զարգացման հենասյուն» թեմայով խորհրդարանական լսումների ժամանակ ասաց ԿԳՄՍ նախարար Վահրամ Դումանյանը:

Նախարարն ընդգծեց, որ անվտանգություն ասելով՝ պետք է հասկանանք ուժեղ միտք, ճիշտ գաղափար և ճիշտ գնահատական մեր իրականությանը:

«Անվտանգությունը պետք է սկսվի մեր գիտակցության մեջ: Մենք պետք է մեր առջև խնդիր դնենք այնպիսի ռազմարդյունաբերություն ունենալ, որ աշխարհի հսկաների հետ հավասարը հավասարի խոսենք, կարծում եմ՝ մտածելու առիթ կա այստեղ: Առանձին ուղղություններում, առանձին կոնկրետ խնդիրներում, այո՛, մենք կարող ենք գրանցել արդյունք, որը չի հաջողվի գրանցել գերտերություններին, որովհետև սա մտքի արդյունք է: Միտքն անսահմանափակ է: Մեր մտքի մեծությունը կապ չունի մեր երկրի մեծության, տարածքային ու նաև տնտեսական ցուցանիշների հետ: Դա գիտնականի մտքի թռիչքն է: Եվ սա մենք պետք է կարևորենք»,- ընդգծեց Դումանյանը:

Նախարարը նաև նշեց, որ չպետք է սպասել, որ գիտական աշխարհում որևէ հրաշք տեղի կունենա նման համեստ գումարների դեպքում։ «Պետք է մտածենք, պետք է այնպես լինի, որ երիտասարդները մնան երկրում»,- հավելեց նախարարը։

«Եթե մեր գիտակցությունը լինի անվտանգ, մենք կլինենք նաև անվտանգ ֆիզիկապես ու ռազմական առումով։

Միայն քննարկելը բավարար չէ, այս հարցով պետք է անցնենք ռեալ գործողությունների։ Այդ շարքում շուտով օրենքի նախագիծ կքննարկվի։ Իրավիճակից դրդված պետք է անհապաղ որոշակի միջոցներ ձեռնարկել, այսպես թողնել չի կարելի։

Մի օրինակ բերեմ՝ ինքնաթիռը, որ թռչում է, երբ տուրբուլենտային գոտում է հայտնվում, օդանավի հրամանատարը ավտոկառավարվող ռեժիմից ձեռքի ռեժիմ է վերցնում և դուրս է բերում տուբուլենտային գոտուց։ Եթե որևէ մեկը կասկածում է, թե այն համակարգը, որն օրենքը ուզում է կարգավորել, գտնվում է տուրբուլենտային գոտում, ես պիտի իր հետ չհամաձայնեմ։ Ես կարծում եմ՝ շատ էլ ուժեղ տուրբուլենտային գոտում ենք այսօր գտնվում՝ և բարձրագույն կրթության, և գիտության առումով»,- նշեց Դումանյանը։

Մանրամասները՝ տեսանյութում: