30.06.2026 | 23:28
«Ուիմբլդոն»․ Կարեն Խաչանովը մեկնարկել է հաղթանակով
Գեորգի Կուտոյանի մահից շուրջ 1 տարի անց․ ի՞նչ նոր հանգամանքներ են պարզվել. ՏԵՍԱՆՅՈՒԹ
Հասարակություն
21.01.2021 | 16:44
Ազգային անվտանգության ծառայության (ԱԱԾ) նախկին տնօրեն Գեորգի Կուտոյանի մահվան դեպքի առթիվ հարուցված քրեական գործը չի կարճվել: Այսօր լրագրողների հետ ճեպազրույցում այս մասին ասաց Քննչական կոմիտեի նախագահի տեղակալ, հատկապես կարևոր գործերի քննության գլխավոր վարչության պետ Արթուր Մելիքյանը։
Քննչական կոմիտեի բարձրաստիճան պաշտոնյան շեշտեց, որ գործով կասկածյալներ ու մեղադրյալներ չկան, տեղի ունեցածը ինքնասպանություն է։
38-ամյա Գեորգի Կուտոյանի դին՝ հրազենային վնասվածքով, հայտնաբերվել էր անցյալ տարվա հունվարի 17-ին, երևանյան շենքերից մեկի բնակարանում։ Փաստի առթիվ քրեական գործը հարուցվել էր Քրեական օրենսգրքի 110-րդ հոդվածի 1-ին մասով՝ «ինքնասպանության հասցնելը»։
Հիշեցնենք՝ Գեորգի Կուտոյանը Հայաստանի երրորդ նախագահ Սերժ Սարգսյանի թիմակիցն էր, 2016 թվականի փետրվարին նշանակվել էր Ազգային անվտանգության ծառայության ղեկավար՝ փոխարինելով Գորիկ Հակոբյանին, այդ պաշտոնից ազատվել էր 2018-ի հեղափոխությունից հետո: Մինչև ԱԱԾ տնօրենի պաշտոնում նշանակվելը, Կուտոյանը զբաղեցնում էր գլխավոր դատախազի տեղակալի պաշտոնը:
Քննչական կոմիտեի նախագահը, ավելի վաղ անդրադառնալով Կուտոյանի մահվան դեպքին, ասել էր, թե տեղի է ունեցել ինքնասպանություն՝ նեղ անձնական շարժառիթով։
Կուտոյանի ընտանիքի անդամները դիմել են իրավապահներին՝ պահանջելով գործից մանրամասներ չհրապարակել։
Մանրամասները՝ տեսանյութում։
Լիլիթ Շաբոյան
