11.10.2026 | 23:33
Հակոբ Շարբաթյանը՝ բռնցքամարտի Եվրոպայի Մ-17 չեմպիոն. ՏԵՍԱՆՅՈՒԹ
Ծննդյան օրը՝ հուղարկավորություն․ գերի ընկած Արսեն Ղարախանյանի մարմինն են գտել
Հասարակություն
20.01.2021 | 15:56
Օրեր առաջ Factor.am-ը գրել էր, որ Հադրութի իր տնից անհետ կորած Արսեն Ղարախանյանի ընտանիքի անդամները, երեք ամիս նրանից լուր չունենալուց հետո, հունվարի 6-ին Ադրբեջանի տարածած տեսանյութում տեսել ու ճանաչել էին նրան։
Արցախում հունվարի 18-ի որոնողական աշխատանքների արդյունքում հայտնաբերվել է 7 զինծառայողի և 1 քաղաքացիական անձի մարմին: Քաղաքացու ինքնությունը հաջողվել է պարզել՝ նա 1976 թվականին ծնված Արսեն Ղարախանյանն է: Նրան հաջողվել է ճանաչել հագուստից, գրպանում եղել է նաև բջջային հեռախոսը:
Ղարախանյանի դին հայտնաբերվել է Հադրութում։ Նրա հարազատները Factor.am-ին պատմեցին, որ որոնողական աշխատանքներ իրականացնելիս փրկարարներն այդ տարածքով անցնել են, բայց դին չեն գտել, միայն երկրորդ անգամ անցնելիս են տարածքում նկատել, որ փոսն այլ ձև ունի։ Քանդել են ու գտել Ղարախանյանի մարմինը՝ կապտուկներով։
Արսենի որդին մեզ պատմեց, որ այսօր Արցախում տեղի է ունեցել հուղարկավորությունը․ «Այսօր հայրիկիս ծննդյան օրն էր, հենց այսօր էլ հուղարկավորեցինք»։
Նշենք, որ այս ընտանիքի պապը՝ Ալեքսանդր Ղարախանայնը նույնպես գերեվարվել էր։ Նա դեկտեմբերին հայրենիք վերադարձած 44 գերիների թվում էր։
Լիլիթ Շաբոյան
