13.12.2025 | 22:20
Ֆրանսիան հաղթեց «Մանկական Եվրատեսիլ»-ում
Արարատ Միրզոյանի՝ Թուրքիայի հատուկ ծառայությունների գործակալ լինելու վերաբերյալ հրապարակումները Դատախազությունն ուղարկել է ԱԱԾ
Հասարակություն
19.01.2021 | 18:32
Ազգային ժողովի նախագահ Արարատ Միրզոյանի՝ Թուրքիայի հատուկ ծառայությունների գործակալ լինելու ու դրա հետ կապված մնացած տեղեկությունների վերաբերյալ հրապարակումները ՀՀ գլխավոր դատախազությունն ուղարկել է Ազգային անվտանգության ծառայություն:
«Պետք է քննվեն «Քրեական դատավարության մասին» օրենսգրքի 180-րդ և 181-րդ հոդվածներին համապատասխան հանցակազմի առկայության ու քրեական գործ հարուցելու կամ չհարուցելու հարցը», – Factor.am-ին ասաց ՀՀ գլխավոր դատախազության մամուլի պատասխանատու Արևիկ Խաչատրյանը:
Հիշեցնենք՝ Սերժ Սարգսյանի փեսա Միքայել Մինասյանը հայտարարել էր, որ Արարատ Միրզոյանը եղել է թուրքական, ապա հայկական հատուկ ծառայությունների գործակալ: ԱԱԾ-ն հերքել էր այս լուրը: «ՀՀ ազգային անվտանգության ծառայությունը պաշտոնապես տեղեկացնում է, որ ՀՀ նախկին դեսպան Միքայել Մինասյանի կողմից հրապարակված և ՀՀ Ազգային ժողովի նախագահ Արարատ Միրզոյանի՝ հատուկ ծառայությունների գործակալ լինելուն և տարածված այլ փաստաթղթերին վերաբերող տեղեկատվությունն ակնհայտ սուտ է ու իրականության հետ որևէ աղերս չունի», – նշված էր ԱԱԾ տարածած հաղորդագրության մեջ։
Թեմային անդրադարձել էր նաև Արարատ Միրզոյանը: «Միքայել Մինասյանի հերթական ցնդաբանությունը պետք է արժանանա պատշաճ քրեաիրավական գնահատականի,- ֆեյսբուքյան իր էջում գրել է ՀՀ ԱԺ նախագահ Արարատ Միրզոյանը:- Մինասյանը պետք է պատասխան տա նաև այս սուտ մատնության համար», – գրել էր Միրզոյանը:
