14.09.2026 | 23:23
Պապիկյանի գլխավորած պատվիրակությունն աշխատանքային այցով մեկնել է Չինաստան
ՀՀ պետական պարտքը հասնում է շուրջ 8 միլիարդ դոլարի
Տնտեսություն
11.01.2021 | 18:53
2020 թվականին տնտեսական ցնցումները, պայմանավորված նախ՝ կորոնավիրուսի համաճարակով, այնուհետև շուրջ 1․5 ամիս տևած պատերազմով, իրենց հետքն են թողել նաև ՀՀ պետական պարտքի վրա։ 2020թ․ նոյեմբերի դրությամբ՝ այն կազմել է 7 միլիարդ 947 միլիոն դոլար, որից 6.005 մլրդ դոլարը արտաքին պարտքն է, իսկ 1 մլրդ 943 մլն դոլարը՝ ներքին պարտքը։ Այս մասին տեղեկանում ենք Ֆինանսների նախարարության հրապարակած տվյալներից։
2020-ի սկզբին ՀՀ պետական պարտքը կազմել է 7 միլիարդ 321 միլիոն դրամ։ Այսպիսով՝ 11 ամիսների ընթացքում պետական պարտքը, դոլարային արտահայտությամբ, ավելացել է 626.2 մլն դոլարով կամ 8.5%-ով։
Հաշվի առնելով այն հանգամանքը, որ պետական պարտքը մեծապես մարվում և սպասարկվում է ԱՄՆ դոլարով, իսկ դոլարի փոխարժեքը վերջին տարվա ընթացքում ևս ցնցումների ենթարկվեց, կարելի է ենթադրել, որ պետական պարտքի ավելացումը կապված է նաև դոլարի թանկացման հետ։
2020-ի սկզբի դրությամբ՝ ՀՀ պետական պարտքը, դրամային արտահայտությամբ, կազմել է 3 տրիլիոն 512 միլիարդ դրամ, իսկ նոյեմբերի վերջի դրությամբ՝ 4 տրլն 39 մլրդ դրամ՝ տարեսկզբի համեմատ աճելով 527 մլրդ դրամով կամ 15%-ով։ Այսպիսով՝ եթե դոլարային արտահայտությամբ ՀՀ պետական պարտքը, տարեսկզբի համեմատ, աճել է 8․5%-ով, ապա դրամային արտահայտությամբ ավելացումը կազմում է 15%:
Նշենք, որ 2021 թվականի պետական բյուջեի նախագծում կանխատեսվում է, որ 2021-ի վերջում պետական պարտքը կհատի 9 մլրդ դոլարի շեմը։
Անժելա Պողոսյան
