27.06.2026 | 11:33
Արտարժույթների փոխարժեքները՝ հունիսի 27-ի դրությամբ
Ջաբրայիլում ու Հադրութում հայտնաբերվել է 19 զինծառայողի և 1 քաղաքացիական անձի մարմին․ Արցախի ԱԻՊԾ
04.01.2021 | 13:04
Արցախի՝ Ադրբեջանի վերահսկողության տակ անցած տարածքներում շարունակվող որոնողական աշխատանքների արդյունքում հայտնաբերվել է ևս 20 դի։ Այս մասին Factor.am-ի հետ զրույցում տեղեկացրեց Արցախի Հանրապետության արտակարգ իրավիճակների պետական ծառայության տեղեկատվության եւ հասարակայնության հետ կապերի բաժնի պետ Հունան Թադևոսյանը։
«Երեկ՝ հունվարի 3-ին, Հադրութում և Մեխակավանում (Ջաբրայիլ) հայտնաբերվել է 19 զինծառայողի և 1 քաղաքացիական անձի մարմին։ Զինվորականների մի քանի մարմիններ հայտնաբերվել են Ջաբրայիլի դիրքային հատվածում, որը նախկինում եղել է մեր առաջնագիծը, մի քանիսը՝ Հադրութի դիրքերում», – նշեց Թադևոսյանը։
Գտնված քաղաքացիական անձը տարեց տղամարդ է, նրա դին հայտնաբերել են Հադրութի շրջանի Կարմրակուճ գյուղի տարածքի դաշտավայրային հատվածից։
«Պետք է իրականացվի դատաբժշկական փորձաքննություն, որպեսզի իմանանք, թե այդ անձն արդյոք բեկորային մահացու վիրավորում է ստացել, թե՞ թուրքերն են սպանել։ Դին հայտնաբերվել է դաշտավայրային հատվածում»։
Թադևոսյանը տեղեկացրեց, որ այսօր որոնողական աշխատանքները շարունակվելու են նույն ուղղություններով՝ Հադրութ, Կարմրակուճ, Մեխակավան։
