Պետական պաշտոնյաներն անտեսել են ստալինյան բռնաճնշումների մասին ցուցադրությունները

Նախորդ տարի Երևանում կազմակերպված ստալինյան բռնաճնշումների մասին ցուցադրություններին գրեթե ոչ մի պետական պաշտոնյա ներկա չի եղել, դրանք վերին ատյանների ուշադրությանն այդպես էլ չեն արժանացել: Խոսքը «Խավարում»և «Հակախորհրդայինները» խորագիրը կրող ցուցադրությունների մասին է:

Մշակույթի նախարարության հրահանգով Հովհաննես Թումանյանի թանգարանում ներկայացված «Խավարում» ցուցադրության փակումը սեպտեմբերին վրդովմունքի մեծ ալիք բարձրացրեց հանրության շրջանում։ Թանգարանի տնօրեն Նարինե Թուխիկյանը Factor.am-ի հետ զրույցում ասաց, որ ցուցադրությունը փակվել էր չար զրպարտիչների ձեռքով, որոնք, հավանաբար, ազդեցություն էին ունեցել նախարարության վրա:

Մշակույթի նախարար Արմեն Ամիրյանը, սակայն, պատճառաբանեց, թե ցուցադրանքի բացօթյա ձևաչափը նախարարության հետ համաձայնեցված չէր։ Դրանից հետո փոխնախարար Արև Սամուելյանը հայտարարեց, որ որոշ շտկումներից հետո այն կվերաբացվի։ Արմեն Ամիրյանը ևս հայտարարեց, որ կնախաձեռնի, որպեսզի «Խավարում» ցուցադրությունը վերաբացվի։ Այդ խոստումը, սակայն, մնաց օդում:

Մենք Մշակույթի նախարարությունից հետաքրքրվեցինք, թե ինչն էր պատճառը, որ ի հակառակ խոստման՝ նախարարությունն այդպես էլ չվերաբացեց «Խավարումը», սակայն մեզ պատասխանեցին, որ Մշակույթի նախարարությունն այդ առնչությամբ ամեն ինչ արդեն ասել է: Այսպիսով՝ պետական գերատեսչությունը առանց որևէ պատճառաբանություն ներկայացնելու, հետ կանգնեց իր խոստումից, փոխարենը «Խավարումի» վերաբացման գործը ստանձնեց «Սարգիս Մուրադյան» պատկերասրահի տնօրեն Զարուհի Մուրադյանը:

Ի դեպ, առաջիկայում «Խավարումը» կներկայացվի Սյունիքում, ինչպես նաև Հայաստանից դուրս՝ Ֆրեզնոյում: Factor․am-ը անդրադարձել է նաև Ազգային գրադարանում բացված «Հակախորհրդայինները» ցուցահանդեսի ճակատագրին։ Կազմակերպիչներից մեկը՝ ազգագրագետ Հրանուշ Խառատյանը մեզ հետ զրույցում նշեց, որ այս ցուցադրությամբ ևս ոչ պաշտոնյաներն են հետաքրքրվել, ոչ էլ գիտնականները:

Մանրամասները՝ տեսանյութում։