17.05.2026 | 20:32
ՆԱՏՕ-ի ինքնաթիռները Լատվիայում օդ են բարձրացվել անօդաչու թռչող սարքի պատճառով
ՔԿ-ն Իսրայելում ՀՀ դեսպան Արմեն Սմբատյանին ներկայացրել է որպես նախկին դեսպան
24.12.2020 | 21:37
Այսօր Քննչական կոմիտեն հայտնել էր, որ Իսրայելում Հայաստանի դեսպան Արմեն Սմբատյանին և մշակույթի նախկին նախարար Հասմիկ Պողոսյանին մեղադրանք է առաջադրվել Երևանի կենտրոնում՝ Աբովյան 3 հասցեում գտնվող ԱՕԿՍ-ի շենքի սեփականաշնորհման հետ կապված։
Ուշագրավն այն, որ ՔԿ-ն տարածած հաղորդագրությունում Արմեն Սմբատյանին ներկայացրել է նախկին դեսպան։ Սակայն Արտաքին գործերի նախարարությունից Factor.am-ի հարցին ի պատասխան հայտնեցին, որ Սմբատյանը շարունակում է զբաղեցնել Իսրայելում Հայաստանի դեսպանի պաշտոնը։
Հիշեցնենք՝ պատերազմի առաջին օերերին՝ հոկտեմբերի 1-ին, ՀՀ արտաքին գործերի նախարարության խոսնակ Աննա Նաղդալյանը հայտնել էր, որ ԱԳՆ-ն որոշել է խորհրդակցությունների նպատակով հետ կանչել Իսրայելում ՀՀ արտակարգ և լիազոր դեսպան Արմեն Սմբատյանին։
«Իսրայելի կողմից Ադրբեջանին սպառազինություն վաճառելու վերաբերյալ ՀՀ ԱԳՆ-ն հստակ արտահայտվել է, վերջին անգամ հուլիս ամսին՝ նախարարի մակարդակով։ Եվ այս հարցը մշտապես եղել է մեր երկկողմ օրակարգում։ Բնականաբար, Իսրայելի կողմից Ադրբեջանին գերժամանակակից սպառազինության տրամադրումը մեզ համար անընդունելի է։ Դիվանագիտական խողովակներով բազմիցս այդ մասին հայտնել ենք իսրայելցի մեր գործընկերներին։ Հարկ է նշել, որ դա ցավալի է հատկապես այն ժամանակաշրջանում, երբ Ադրբեջանը Թուրքիայի աջակցությամբ լայնածավալ ագրեսիա է իրականացնում ՀՀ-ի և Արցախի դեմ»,- հայտնել էր նա։
Նաղդալյանն այսօր Factor.am-ին փոխանցեց, որ խորհրդակցությունների համար Երևան հետ կանչելը չի նշանակում, որ նա չի զբաղեցնում դեսպանի պաշտոնը։
Այս թեմայի շուրջ ՔԿ-ից պարզաբանում ստանալ չհաջողվեց։
Նարեկ Կիրակոսյան
