Գյումրիի ավագանին հաստատեց քաղաքի բյուջեն․ նախորդ տարիների համեմատ այն աճել է

Գյումրիի ավագանին այսօր կայացած նիստում հաստատեց քաղաքի 2021 թվականի բյուջեն։ Նախորդ տարվա համեմատ՝ այն որոշակի աճ է արձանագրել։ Եկամուտների մասը կազմում է 4 մլրդ 627 մլն 824 հազար դրամ, ծախսային մասը՝ 4 մլրդ 627 մլն 824 հազար դրամ։

Քաղաքապետարանի ֆինանսատնտեսական բաժնի պետ Լենա Ջիլավյանը նշեց, որ բյուջեն մշակվել է՝ ելնելով համայնքի զարգացման 2017-21թթ․ հնգամյա ծրագրից։
«Համահարթեցման նպատակով պետական բյուջեից կստանանք դոտացիա՝ 2 մլրդ 834․7 մլն դրամ։ Ե՛վ վարչական, և՛ ֆոնդային մասն ուսումնասիրված է, հիմնվել են նախկին տարիների փորձի ու հաշվարկների վրա։ Մեր սեփական եկամուտների պլանն այս պահին 1 մլրդ 715 մլն դրամ է, ֆոնդային բյուջեի պլանը ՝113․7 մլն դրամ»,- ասաց Լենա Ջիլավյանը։

Նշենք, որ Գյումրիի 2020թ․ բյուջեն կազմում է 3 մլրդ 992 միլիոն 675 հազար դրամ, 2019թ․՝ 3 մլրդ 587 մլն 973 հազար դրամ։

Բացի այդ, ավագանին նաև որոշեց ռազմական գործողություններին մասնակցություն ցուցաբերած, վիրավորած ու բուժման մեջ գտնվող սոցիալապես անապահով 5 զինծառայողների ընտանիքներին, որպես դրամական օգնություն հատկացնել 250․000 դրամ․ յուրաքանչյուրին՝ 50․000-ական դրամ։

Ավագանին որոշեց նաև արտոնություն սահմանել 2016 թվականի ապրիլյան քառօրյա և 2020 թվականի քառասունչորսօրյա պատերազմներին Հայաստանի և Արցախի Հանրապետությունների պաշտպանության մարտական գործողությունների ընթացքում զոհված, ծառայողական պարտականությունները կատարելիս անհայտ կորած և օրենքով սահմանված կարգով անհայտ բացակայող կամ մահացած ճանաչված անձանց (կամ ընտանիքի անդամներին) պատկանող գույքի գույքահարկի նկատմամբ՝ մինչև այդ անձանց զավակներից մեկի 18 տարին լրանալը:

Էմմա Չոբանյան