Վերջին երեք օրվա ընթացքում կորոնավիրոսի 702 նոր դեպք է հաստատվել, կատարված 2743 հետազոտությունից, ընդհանուր դեպքերի թիվը արդեն 156 հազար է: Այս մասին այսօր կառավարության նիստում ասաց առողջապահության նախարար Արսեն Թորոսյանը:
«Արդեն մոտ երկու շաբաթ է որևէ հիվանդ չունենք, որը տանը սպասում է հոսպիտալացման, բոլորը ստանում են պատշաճ բուժօգնություն… Կոչ ենք անում պահպանել հակահամաճարակային կանոնները, քանի դեռ այս հիվանդության դեմ պայքարի այլ տարբերակ չունենք: Հաշվի առնելով այն հանգամանքը, որ մարդիկ հիմա ավելի շատ են լինում փակ տարածքներում, և ավելի քիչ են օդափոխվում այդ տարածքները, այս շրջանում վարակի կրկնակի աճի ռիսկն ավելի մեծ է»,- նշեց նախարարը՝ զգոնության և հավելյալ ջանքեր գործադրելու կոչ անելով՝ հաշվի առնելով նաև այն, որ ձմեռային շրջանը շնչառական վարակների համար ակտիվ է լինում:
