19.01.2026 | 19:00
Էրդողանը մեծ դիվիդենտ ստացավ՝ չքանում է քրդական պետություն ստեղծելու ծրագիրը, նրանք զինաթափվում են․ Սագո Արեան․ ՏԵՍԱՆՅՈՒԹ
Կինեմատոգրաֆի հոմանիշներից մեկը. Երևանում նշվեց Ֆեդերիկո Ֆելինիի 100-ամյակը
Մշակույթ
18.12.2020 | 22:32
Համաշխարհային կինոարվեստի կարկառուն ներկայացուցիչ, կինոռեժիսոր Ֆեդերիկո Ֆելինիի 100-ամյա հոբելյանի առթիվ դեկտեմբերի 18-ին «Լոֆթ» ինքնազարգացման կենտրոնում տեղի ունեցավ #FelliniDay կրթամշակութային միջոցառումը։ Ներկաները հնարավորություն ունեցան «տեղափոխվել» կինոյի կնքահայրերից մեկի՝ Ֆելլինիի հայրենի քաղաք Ռիմմինի՝ բացահայտելու հանճարի գաղտնիքը։
«Քսաներորդ դարում Ֆելինին դարձել է կինեմատոգրաֆի հոմանիշներից մեկը: Շատերը, երբ ասում են կինո, առաջին հերթին պատկերացնում են Ֆելինիին: Երկրորդ համաշխարհային պատերազմից հետո, երբ Իտալիայում նոր շունչ առավ կինոն, առաջ եկավ նեոռեալիզմը, իսկ հետո՝ Ֆելինին, որը ստեղծում էր ֆիլմեր, որոնք նման չէին այլ կինոնկարների: Կա մի կարծիք, որ կինոյի հիմքում ընկած արվեստներից մեկը կրկեսն էր. Այն մեծ մասսայականություն էր վայելում հատկապես 19-րդ դարում: Ֆելինին կարողացավ և՛ կրկեսի տարրերը բերել կինո, և՛ սոցիալական երանգը, որն առկա էր հետպատերազմական կինոյում, և՛ իր ուրույն երևակայական աշխարհը: Այս ամենը համադրելով՝ Տոնինո Գուերայի հետ նա ստացավ ուրույն, ձեռագրային, հեղինակային կինո, որը մենք կոչում ենք ֆելինիական կինո»,-«Արմենպրես»-ի թղթակցի հետ զրույցում ասաց «Ոսկե Ծիրան» կինոփառատոնի ստեղծագործական տնօրեն, կինոգետ Կարեն Ավետիսյանը:
Նրա խոսքով՝ Ֆելինիի «Ութ ու կես»-ը, «Ամարկորդ»-ը, «Ճանապարհ»-ը կամ «Կաբիրիայի գիշերները» որքան նման են, այնքան էլ տարբեր են ու արտահայտում են հեղինակի ձեռագրի փոխակերպումները տասնամյակների ընթացքում:
Անդրադառնալով իտալական կինոյի մեկ այլ վարպետ Էտտորե Սկոլայի՝ Ֆելինիին նվիրված «Ֆեդերիկո արտասովոր անունը» ֆիլմին, որը ցուցադրվեց, նա ընդգծեց՝ ընտրել են այդ կինոնկարը, քանի որ այն շատ հետաքրքիր վավերագրություն է, որը յուրահատուկ է մատուցված: Նա հիշեցրեց, որ այս տարի նաև Ֆելինիի ֆիլմերի սցենարների հեղինակ Տոնինո Գուերայի 100-ամյակն է: Երկու մեծերի հոբելյանների կապակցությամբ «Ոսկե ծիրան»-ի շրջանակում ցուցադրել են նրանց աշխատանքները:
«Այս անգամ որոշեցինք ներկայացնել մի ֆիլմ, որով օտար ռեժիսորն է խոսում և պատմում Ֆելինիի մասին: Ցանկացանք Սկոլայի՝ իտալացի մեկ այլ նշանավոր ռեժիսորի աչքերով ցույց տալ Ֆելինիին»,-եզրափակեց Ավետիսյանը:
Միջոցառման շրջանակում տեղի ունեցավ նաև Ֆելինիի ստեղծագործությունների մոտիվներով պաստառների բացառիկ հավաքածուի ցուցադրության բացումը: Հավաքածուն հատուկ ցուցադրության համար Հայաստան է ուղարկվել Ադամ Միցկևիչի ինստիտուտի կողմից։
Միջոցառումն իրականացվեց Հայաստանում Իտալիայի դեսպանատան, Ադամ Միցկիևիչի ինստիտուտի, «Ոսկե Ծիրան»-ի և «Լոֆթ»-ի համագործակցությամբ:
