Մշակույթի հետպատերազմյան լուման. մի շարք օջախներում կամավորական աշխատանքները շարունակվում են. ՏԵՍԱՆՅՈՒԹ

Ինչպես պատերազմական օրերին, այնպես էլ հետպատերազմյան շրջանում հայաստանյան մշակութային մի շարք օջախներ շարունակում են կամավորական սկզբունքով կամ իրենց մասնագիտական գործունեության շրջանակում օգտակար լինել պետությանը:

Այսպես՝ Ալեքսանդր Սպենդիարյանի անվան օպերայի և բալետի ազգային ակադեմիական թատրոնի անձնակազմը պատերազմական օրերին քողարկող ցանցեր էր պատրաստում սահմանի համար, իսկ հիմա արդեն միջնորդի դերում է՝ բարերարների տրամադրած մի շարք ապրանքներ հասցնում է Արցախի փախստականներին: Թատրոնի աշխատակիցներն ու կամավորները նաև գուլպաներ և գլխարկներ են գործում նրանց համար:

Հայաստանի ազգային ֆիլհարմոնիկ նվագախմբի ողջ անձնակազմը ևս պատերազմի օրերին հերթափոխով ռազմաճակատի համար ցանցեր էր գործում։ Այդ աշխատանքը ղեկավարում էր ալտահարուհի Ժաննա Ափինյանը: Հիմա նա կապ է պահում Գերմանիայի հայ համայնքի հետ, որի ֆինանսավորմամբ օգնում է պատերազմի ընթացքում զոհված կամ վիրավորված զինծառայողների ընտանիքներին:

Պատերազմի ընթացքում Երևանի պետական տիկնիկային թատրոնում կամավորական աշխատանքներ էին ընթանում՝ Արցախից եկած ընտանիքներին սնունդով, հագուստով, դեղորայքով և հիգիենայի պարագաներով ապահովելու ուղղությամբ։ Ի դեպ, թատրոնն այդ օրերին չփակեց վարագույրները. ներկայացումներ խաղաց արցախցի մանուկների համար։ Ռեժիսոր Սամսոն Մովսեսյանը տեղեկացնում է՝ կառույցն այժմ էլ իրականացնում է մի շարք ծրագրեր:

«Սարգիս Մուրադյան» պատկերասրահը պատերազմի ժամանակ հավաքագրում էր ամենատարբեր իրեր և ուղարկում ռազմաճակատ, իսկ հիմա կամավորների խումբն այնտեղ արցախցի փախստականների հոգսերն է հոգում՝ վերջիններիս ապահովելով անկողնային պարագաներով: Ի դեպ, այս օրերին պատկերասրահում ներկայացված է ցուցահանդես-վաճառք, որից ստացված ողջ հասույթը կուղղվի կամավորական ծրագրերին:

Պատերազմի ամենաթեժ օրերին Գյումրու Վարդան Աճեմյանի անվան պետական դրամատիկական թատրոնը ներկայացմամբ հանդես եկավ Գյումրիում և Երևանում՝ ամբողջ հասույթն ուղղելով «Զինծառայողների ապահովագրության հիմնադրամ»-ին: Այժմ էլ թատրոնն անակնկալ ունի:

Մանրամասները՝ տեսանյութում:

Աննա Բաբաջանյան