Կա՞ արդյոք մի հոգի, որ չմտածի օր առաջ գերիները վերադառնան, ի՞նչ ուղղորդվածություն. Թոխատյան. ՏԵՍԱՆՅՈՒԹ

«Մենք հանդիպեցինք ԱՄՆ դեսպանատան դիվանագիտական կորպուսի ներկայացուցիչների հետ, նրանց հանձնեցինք նամակ-խնդրանք: Այն կփոխանցվի դեսպանին: Ակնկալում ենք պատասխան: Ասացին, որ դեսպանի ծանոթանալուց հետո, պատասխանը կուղարկվի մեզ»,- այս մասին ԱՄՆ դեսպանատան առաջ լրագրողների հետ զրույցում ասաց դերասան, ՀՀ ժողովրդական արտիստ Հրանտ Թոխատյանը:

Արվեստագետները և մտավորականները ՀՀ-ում ԱՄՆ դեսպանատան դիմաց հավաք են կազմակերպել,  նպատակն է աջակցել զինվորների և զինծառայողների հարազատներին և իրենց ձայնը հասցնել միջազգային բոլոր հեղինակավոր կառույցներին։ Նրանք երկու օր առաջ արդեն եղել են ՌԴ և Ֆրանսիայի դեսպանատների մոտ և հանձնել են նամակներ՝ խնդրելով աջակցել հայ գերիներին և անհետ կորածներին, ինչպես նաև զոհվածների դիերը վերադարձնելու հարցում։

Անդրադառնալով դիտարկմանը, որ բողոքի երթեր իրականացնող մտավորականությունն այս օրերին սոցցանցերում թիրախավորվեց, Հրանտ Թոխատյանը նշեց. «Ավելի լավ է կարծեմ, որ դա ուղղորդված է, քան մտածեմ, որ անտարբերություն կա, որի պատճառով հիմա այստեղ մարդկանց բազմահազարանոց հոսք չկա… Չգիտեմ՝ ուղղորդել են, թե ոչ, բայց այս հարցում ուղղորդելն առնվազն տականքություն է, որովհետև այստեղ հավաքվածները փորձում են իրենց հարազատներին վերադարձնել: Սրանում ի՞նչ ուղղորդվածություն կարող է լինել, այս հարցը հուզում է բոլորին: Կա՞ արդյոք մեր հանրապետությունում մի հոգի, որ չմտածի օր առաջ մեր գերիներին և զոհվածների դիերը վերադարձնելու մասին»,- նշեց Թոխատյանը:

Մանրամասները՝ տեսանյութում: