11.10.2026 | 23:33
Հակոբ Շարբաթյանը՝ բռնցքամարտի Եվրոպայի Մ-17 չեմպիոն. ՏԵՍԱՆՅՈՒԹ
ՀՀ ժողովրդական արտիստ Սվետլանա Նավասարդյանն արժանացել է «Համագործակցության աստղեր» միջպետական մրցանակի
Մշակույթ
29.11.2020 | 20:07
«Համագործակցության աստղեր» միջպետական մրցանակաբաշխության հանդիսավոր արարողությունը, այս տարի Covid-19-ով պայմանավորված, անցկացվել է հեռավար. տեղեկացնում են ԿԳՄՍՆ-ից:
«Համագործակցության աստղեր» միջպետական մրցանակին է արժանացել ՀՀ ժողովրդական արտիստ, անվանի դաշնակահար Սվետլանա Նավասարդյանը: Մրցանակը հանձնել է ՀՀ ԿԳՄՍ նախարարի տեղակալ Արա Խզմալյանը: Շնորհավորելով բոլոր դափնեկիրներին՝ նախարարի տեղակալը նշել է, որ իր համար մեծ պատիվ է «Համագործակցության աստղեր» մրցանակը հանձնել Սվետլանա Նավասարդյանին: Արա Խզմալյանը շնորհակալություն է հայտնել անվանի դաշնակահարին՝ նրա արվեստի բարձր պրոֆեսիոնալիզմի և կատարած աշխատանքի համար:
«Այս մրցանակն ավելի հեղինակավոր է դափնեկիրների շնորհիվ»,- ասել է Արա Խզմալյանը և հավելել, որ այսպիսի միջոցառումները մշտապես նպաստում են մեր երկրների միջև փոխհամագործակցությանն ու փոխըմբռնմանը, երկրների միջև հումանիտար կապերի ամրապնդմանը:
Ստանալով մրցանակը՝ Սվետլանա Նավասարդյանը ողջունել է մասնակիցներին և նշել, որ իր համար մեծ պատիվ է արժանանալ այս մրցանակին, որի նպատակը համամարդկային արժեքների հաստատումն է, որոնք անխուսափելիորեն պաշտպանում են գեղեցիկը: «Ես ուրախ եմ, որ գեղեցիկը ստեղծելու մեջ նաև իմ ներդրումն ունեմ»,- հավելել է Ս. Նավասարդյանը և բոլոր դափնեկիրներին մաղթել նորանոր ձեռքբերումներ՝ ի նպաստ մեր երկրների միջև մշակութային կապերի զարգացման:
«Համագործակցության աստղեր» միջպետական մրցանակը սահմանել է 2009 թվականին ԱՊՀ մասնակից պետությունների Հումանիտար համագործակցության խորհրդի Հումանիտար համագործակցության միջպետական հիմնադրամը:
Այն ամեն տարի շնորհվում է ԱՊՀ պետությունների ներկայացուցիչներին՝ մշակույթի և արվեստի, գիտության և կրթության, հումանիտար գործունեության բնագավառներում՝ նշանակալի ձեռքբերումների համար:
