Մի քանի ժամ առաջ տեղեկացրել են, որ Բերձորի բնակիչները կարող են մնալ իրենց տներում։ Այս մասին Factor.am-ին հայտնեց Բերձորի քաղաքապետ Նարեկ Ալեքսյանյանը՝ նշելով, որ իրենց այդ մասին ասել է Քաշաթաղի շրջանի վարչակազմի ղեկավարի ժամանակավոր պաշտոնակատար Մուշեղ Ալավերդյանը։
«Երեկ հստակ էր, որ կառավարումը չի հանձնվելու, բայց բնակչությունը պետք է այստեղ չլիներ։ Այսինքն՝ լիներ կառտավարումը մեր կողմից՝ փոքր անձնակազմով, բայց բնակիչները չլինեին։ Առավոտյան այնպես եղավ, որ կառավարումն էլ է մնում, բնակիչներն էլ կարող են մնալ, ապրել։ Դա շատ ուրախալի լուր է բնակչության մեծ մասի համար։ Գնալ, ուրիշ տեղ տեղավորվելն իրենց համար խնդիր էր, և դեռ սպասում էին, որ ինչ-որ բան կփոխվի։ Այնպես չէ, որ մեծ թվով բնակիչներ երեկ լքեցին բնակավայրը»,-ասաց Նարեկ Ալեքսանյանը։
Նրա խոսքով՝ այս որոշումը կարևոր է, քանի որ այս ընթացքում քաղաքը բնակիչների է ընդունել նաև հյուսիսային ու հարավային շրջաններից։ Բերձորի քաղաքապետը նշեց, որ նաև զանգեր է՝ ստանում ճանապարհի անվտանգության հետ կապված, և հավաստիացրեց, որ առանց փաստաթղթի Բերձորից գնացել են Ստեփանակերտ և որևէ խնդիր չի եղել։
«Ինձ բնակիչ է զանգել, ասում է՝ ասում են ճամփին թուրքեր կան։ Ասում եմ՝ ժողովուրդ, մենք այստեղ ապրում ենք։ Եվ ճամփան՝ մինչև Բերձոր, Լեսագոր, վստահ եղեք, որ ամենաանվտանգ ճամփան է։ Ոչ մեկը այդ ճամփի վրա այս ընթացքում որևէ խոչընդոտ չի ունեցել։ Մեր բնակիչներից մեկը մոտ 1 ժամ առաջ Երևանից եկել է Բերձոր՝ առանց արգելքի, առանց խոչընդոտի, ոնց կգնար-կգար 3 ամիս առաջ», – ավելացրեց Ալեքսնայանը։
Հիշեցնենք՝ երեկ բերձորցիներին ասել էին, որ մինչև նոյեմբերի 30-ը պետք է լքեն տները, քանի որ Բերձորը հանձնում են Ադրբեջանին։
Բերձորը մինչ պատերազմի սկսվելը 500-ից ավելի տնային տնտեսություն և 1700-ից բնակիչ ուներ։
Իրինա Մկրտչյան
