Ռազմական դրությունը պետք է հանվի, որ սկսվի Փաշինյանի իմպիչմենտի գործընթաց. Զոհրաբյան. ՏԵՍԱՆՅՈՒԹ

Դեռ ժամանակը և քննիչ հանձնաժողովները ցույց կտան, թե Արցախը հանձնելը եղել է անմեղսունակության, տգիտության, դիլետանտիզմի, խելահեղ փառասիրության, թե դավաճանության արդյունք: Ազգային ժողովում իր ելույթն այսպես սկսեց «Բարգավաճ Հայաստան» խմբակցության պատգամավոր Նաիրա Զոհրաբյանը:

«Թուրքի սահմանն այլևս, Նիկոլ Փաշինյանի «շնորհիվ», մեր հայրենիքի հսկայածավալ սահմանն է: Ասում եք՝ այս թուղթը եռակողմ ստորագրված փաստաթուղթ է, և այդ  նվաստացուցիչ ժամանակացույցով մենք հայրենիք ենք հանձնում»,- ասաց Նաիրա Զոհրաբյանը: -Միշտ մտածել եմ, որ էմոցիոնալ մարդ չեմ, բայց երբ տեսա՝ ինչպես փակվեցին Քարվաճառի դարպասները, հազարապատիկ ատեցի հանձնողներին»:

«Դուք սպանել եք մեզանից յուրաքանչյուրի ազգային արժանապատվությունը, չեք ուզում ընդունել, որ Ցեղասպանությունից հետո սա Հայաստանի ամենածանր հարվածն էր, ամենածանր մարդկային և տարածքային կորուստները: Այս դավաճանական կապիտուլյացիոն փաստաթղթով վտանգը այսուհետ Հայաստանի գլխին է լինելու:

Ցավով եմ նայում, որ մարդը, որ երկուսուկես տարի առաջ իշխանության եկավ որպես կուռք, երկու տարվա մեջ վերածվեց արհավիրքի, մարդ, ով հպարտ քայլում էր փողոցում, իսկ հիմա, երբ անհետ կորածների ծնողների հետ հանդիպում է իր կառավարական սենյակում, ամեն պատի տակ մի քանի թիկնապահ է «դրված»: Այդ մարդը դարձել է Չեխովի «Պատյանով մարդը», նա վախենում է ամեն ինչից, ամեն տեղ դավադրություններ է տեսնում, բոլորի մեջ տեսնում է իր անձին, իր աթոռը վտանգող դավադրություն: Չկա քաղաքակրթության, գալակտիկայի մեջ չի կարող լինել դեպք, երբ երկիրը ղեկավարի պարտված ղեկավարը: Նա պետք է հեռանա:

Հայաստանի անվտանգությունն այլևս մեծագույն ռիսկի տակ է, որովհետև Նիկոլ Փաշինյանի թեթև ձեռքով թուրքի սահմանը եկել է յուրաքանչյուրիս տուն»,- ասաց Զոհրաբյանը:

«Ռազմական դրությունը պետք է հանվի, որ հնարավորություն ունենանք խորհրդարանում սկսել պարտված ղեկավարի իմպիչմենտի գործընթացը»,- ընդգծեց Զոհրաբյանը: – Փաշինյանը ևս գիտի, որ հեռանալու է, բոլորն էլ գիտեն, որ իր հետհաշվարկի ժամացույցը միացված է»:

Մանրամասները՝ տեսանյութում: