Ես խորհուրդ կտամ զսպել մեր բոլոր ցանկությունները. Գագիկ Մելիքյանը՝ թանկացումների մասին

«Ես համոզված եմ՝ այդ ամենը լուրջ ազդեցություն է ունենալու բոլոր խավերի վրա, և այդ ամենը չի բխում ոչ մեկի շահերից: Կարծում եմ՝ դա օգտագործել որպես պատրվակ և երթ անցկացնել՝ նույնպես չի բխում մեր ժողովրդի շահերից»,- Factor.am-ի հետ զրույցում անդրադառնալով թանկացումների դեմ «Ելք»-ի կողմից հունվարի 19-ին անցկացվելիք երթին՝ ասաց Աժ ՀՀԿ խմբակցության քարտուղար Գագիկ Մելիքյանը՝ պարզաբանելով, թե այդ թանկացումները հիմնականում պայմանավորված են նոր Հարկային օրենսգրքի ուժի մեջ մտնելով:

«Չեմ կարծում, որ երթ անցկացնելը նպաստում է գնանկմանը: Երթ անցկացնելով չէ, որ գնանկում պետք է ակնկալել, այլ արդյունավետ աշխատանքով»,- շարունակեց Գագիկ Մելիքյանը՝ պնդելով, որ կառավարության ծրագրերի իրականացումը կնպաստի քաղաքացիների սոցիալական վիճակի բարելավմանը:

Factor.am-ի հարցին՝ ի՞նչ խորհուրդ կտա քաղաքացիներին, ինչպե՞ս անեն մինչև կառավարության ծրագրերի իրականացման արդյունքում որևէ փոփոխություն լինի, իշխող ուժի ներկայացուցիչը հորդորեց զսպել ցանկությունները:

«Մարդիկ վարվում են այնպես, ինչպես իրենք են ճիշտ համարում: Ես խորհուրդ կտամ այնպես, ինչպես ես եմ անում՝ զսպել մեր բոլոր ցանկությունները: Եվ իրականացնել այն, ինչ խիստ անհրաժեշտ է: Պետք չէ լուրջ նպատակներ, լուրջ ծրագրեր իրենց առջև դնեն՝ շատ մեծ ծախսերի հետ կապված»,- ընդգծեց Մելիքյանը:

Մեր դիտարկմանը՝ մարդիկ օրվա հացի խնդիր ունեն, Գագիկ Մելիքյանը համաձայնեց. «Ես համոզված եմ, որ կան մարդիկ, որոնց համար իրոք դժվար է, իրոք ընկալում եմ, բայց պետք է հորդորեմ, որ փորձեն ավելի շատ աշխատել: Միայն աշխատանքով է հնարավոր հասնել նպատակների իրականացման»:

Մանրամասները՝ տեսանյութում:

Շողիկ Գալստյան