Ինչո՞ւ չեն տարհանվել Շուշիի թանգարանների նմուշները․ փոխադարձ մեղադրանքներ և նմուշների անորոշ ապագա. ՏԵՍԱՆՅՈՒԹ

Արցախի մշակութային կենտրոն համարվող Շուշիում գործել է 4 պետական և 2 մասնավոր թանգարան։ Միայն գորգերի մասնավոր թանգարանի ցուցանմուշներն են տարհանվել հոկտեմբեր ամսին։

Շուշի քաղաքի թանգարանների ՊՈԱԿ-ի տնօրեն Լուսինե Գասպարյանը օրեր առաջ ֆեյսբուքում ահազանգեց, որ ՊՈԱԿ-ի կազմում գտնվող 4 թանգարաններից 3-ի ցուցանմուշները տեղափոխել են ռազմապաստարան, բայց դրանք  այդպես էլ չեն տարհանվել։ Գասպարյանն այդ հարցում մեղադրեց  Արցախի կրթության, գիտության և մշակույթի նախարարությանը։ Ինչ նմուշներ էին պահպանվում այդ թանգարաններում և ինչու չեն հանվել՝ Լուսինե Գասպարյանը Factor.am-ին մանրամասնում է՝ նոյեմբերի առաջին օրերին արդեն 3 թանգարանի նմուշներն անձամբ փաթեթավորել էր։

Թանգարանները բացվել են 2013թ-ին, այս տարիներին դրանց ղեկավարմամբ զբաղվող Գասպարյանի խոսքով՝ Կերպարվեստի թանգարանում պահվում էր 800-ի մոտ ցուցանմուշ, երկրաբանության թանգարանում՝ շուրջ 700։

Իսկ ինչո՞ւ չտարհանվեցին այդ նմուշները։ ՊՈԱԿ-ի ղեկավարը նշում է՝ «Նախևառաջ՝ չէին մտածում, որ Շուշի բերդաքաղաքը կանցնի թշնամու ձեռքը»:

Գասպարյանն ասում է՝ կկազմակերպեր տարհանումը, եթե նախարարությունից ստանար հրահանգ։

ԱՀ կրթության, գիտության և մշակույթի նախարար Լուսինե Ղարախանյանը, մինչդեռ, Factor.am-ի հետ զրույցում հակադարձում է՝ «ՊՈԱԿ-ների ղեկավարները պետք է  իրենք կազմակերպեին տարհանումը, իսկ նախարարությունը կաջակցեր»։

Ղարախանյանը օրինակ է բերում Շուշիի գորգերի մասնավոր թանգարանը, որի  ղեկավարի նախաձեռնությամբ արժեքավոր ցուցանմուշները  դուրս  են բերվել քաղաքից։  Ամեն դեպքում ավելացնում է՝ եթե հնարավոր համարեին Շուշին գրավելը, ապա ոչ մի թանգարանային նմուշ չէին թողնի քաղաքում:

Իսկ ինչո՞ւ տարհանման աշխատանքներին չեն մասնակցել Հայաստանի ԿԳՄՍ նախարարությունից։ Լուսինե Գասպարյանի խոսքով՝ եղել են թյուր տեղեկություններ՝ հայկական կողմը պատրաստ է եղել տարհանումը կազմակերպել, բայց Արցախի նախարարությունից նշել են, որ արդեն կազմակերպվել է տարհանումը՝ նկատի ունենալով միայն գորգերի դուրսբերումը։

Հայաստանի  ԿԳՄՍ փոխնախարար  Նարինե Խաչատուրյանը մեզ հետ զրույցում նշեց՝ այդ թանգարանից 3 գործ են վերցրել, որոնք Հայաստանի պատկերասրահին են պատկանել:

Արցախի ԿԳՄ նախարարի խոսքով՝ այդ նմուշները փրկել հնարավոր է ոչ թե միջազգային կառույցների օգնությամբ, այլ ռուս խաղաղապահների։

Արդյոք քայլեր արդեն ձեռնարկվե՞լ են, թե՝ ոչ, և ինչքանով է այդ տարբերակը հավանական, Ղարախանյանը չպատասխանեց՝ խոստացավ դրական արդյունքի դեպքում անպայման կհրապարակեն։

Մանրամասները՝ տեսանյութում:

Իրինա Մակրտչյան