ԱՄՆ-ն ու Ֆրանսիան ԼՂ հարցում ավելի շատ հստակություն են պահանջում Ռուսաստանից. ՏԱՍՍ

ԱՄՆ-ը և Ֆրանսիան Ռուսաստանից ավելի շատ հստակություն են պահանջում Լեռնային Ղարաբաղում ռազմական գործողությունների ամբողջական դադարեցման պայմանների, ինչպես նաև ձեռք բերված պայմանավորվածություններում Թուրքիայի դերի վերաբերյալ: Այս մասին երկուշաբթի օրը ճեպազրույցի ժամանակ հայտարարել են ԱՄՆ Պետդեպարտամենտի բարձրաստիճան ներկայացուցիչները, փոխանցում է ՏԱՍՍ-ը։

Խոսելով ԱՄՆ պետքարտուղար Մայք Պոմպեոյի ու Ֆրանսիայի ԱԳՆ ղեկավար Ժան-Իվ լե Դրիանի միջև Փարիզում կայացած բանակցությունների մասին՝ պաշտոնական ներկայացուցիչները նշել են, որ վերջիններս քննարկել են Լեռնային Ղարաբաղի խնդիրը։

«Նրանք երկար խոսել են Լեռնային Ղարաբաղի մասին: Որպես երկու համանախագահող՝ նրանք կիսում են նույն կարծիքը․ մենք հավատարիմ ենք մնում Մինսկի խմբի գործընթացում  համանախագահների դերակատարությանը», – հայտարարել են  ամերիկացի դիվանագետները:

Ըստ նրանց՝ ԱՄՆ-ի և Ֆրանսիայի արտգործնախարարները «գնահատում են Ռուսաստանի կողմից ձեռնարկված գործողությունները, որոնք հանգեցրել են զինադադարի, որը մոտ մեկ շաբաթ է պահպանվում է, բայց նաև խոստովանում են, որ դեռ շատ հարցեր կան այս համաձայնագրի պարամետրերի, ինչպես նաև Թուրքիայի դերակատարության վերաբերյալ, որը Ռուսաստանը պետք է հստակեցնի»:

Տեղեկացվել է, որ Ռուսաստանը համանախագահներին հրավիրել է Մոսկվա՝  պարզություն հաղորդելու համար, ինչպես նաև հեռախոսազրույցներ են գրանցվել համանախագահների միջև։ Այդ հեռախոսազրույցների ժամանակ քննարկվել է նաև Թուրքիայի շուրջ ստեղծված իրավիճակը, քանի որ Թուրքիայի հետ տարաձայնություններ կան ողջ Արևելյան Միջերկրականում, Լիբիայում, Սիրիայում և այլուր։

Տաթև Ֆռանգյան