17.09.2026 | 18:59
Թուրք ընդդիմադիր պատգամավորը Հայաստան-Թուրքիա սահման է այցելել և կոչ է արել բացել այն
Հրադադարից հետ արցախցինե՞ր են գերեվարվել. ՄԻՊ-ը տիրապետում է տվյալների ադրբեջանական կողմում հայտնված հայ գերիների վերաբերյալ
16.11.2020 | 19:10
Համացանցում տեղեկություններ են տարածվել այն մասին, որ օրեր առաջ՝ հրադադարի հաստատումից հետո, Ստեփանակերտից Մարտունի ճանապարհին Արցախի 4 քաղաքացիներ են գերեվարվել Ադրբեջանի կողմից: Factor.am-ը փորձեց տեղեկությունը ճշտել Կարմիր Խաչի միջազգային կոմիտեի հայաստանյան գրասենյակից։
«Մենք զբաղվում ենք բոլոր հարցերով, որոնք մեր ուշադրության կենտրոնում են հայտնվում, այդ թվում՝ Ձեր նշած վերջին դեպքը: Մենք քննարկում ենք կողմերի և ընտանիքների հետ»,- նշեց ԿԽՄԿ հայաստանյան պատվիրակության հաղորդակցման ծրագրերի ղեկավար Զառա Ամատունին։
Հստակեցնող հարցին՝ արդյո՞ք այդ մասին ահազանգ են ստացել և արդյո՞ք հաստատվել է այն, Զառա Ամատունին պատասխանեց․ «Կարող եմ ասել միայն, որ մենք հետևում ենք այդ բոլոր տեղեկություններին և փորձում ենք համապատասխան ճշտումներ անել»։
Նույն հարցով դիմեցինք նաև ՀՀ Մարդու իրավունքների պաշտպանի գրասենյակ, որտեղից ստացանք հետևյալ պատասխանը․ «Հրադադարի հաստատումից հետո Մարդու իրավունքների պաշտպանը տիրապետում է տվյալների՝ ադրբեջանական կողմում հայտնված հայ գերիների վերաբերյալ, ինչպես նաև ստացել է համապատասխան ահազանգեր: Մենք կապի մեջ ենք նաև նրանց ընտանիքների անդամների հետ, այսօր նրանց մի մասի հետ հանդիպել է Պաշտպանը։ Այս պահին տարվում են անհրաժեշտ աշխատանքներ»։
Հարցի առնչությամբ այլ մանրամասներ ՄԻՊ-ի և ԿԽՄԿ հայաստան ներկայացուցչության գրասենյակից չհայտնեցին։
Անժելա Պողոսյան
