18.11.2024 | 17:28
ԵՄ-ն դադարեցնում է Վրաստանի կառավարությանը տրամադրվող ֆինանսական օգնությունը․ Բորել
ՈՄԱ-ի դասընթացներն ու ադրբեջանական կեղծիքը. ՏԵՍԱՆՅՈՒԹ
Հասարակություն
09.11.2020 | 20:41
Ադրբեջանամետ մի շարք լրատվականներում սկսեց տարածվել հայտարարություն այն մասին, թե Արցախի Հանրապետությունում ձևավորվել է «ահաբեկչական» նոր խմբավորում՝ ՈՄԱ (Ողջ մնալու արվեստը) անունով։ Նշվում էր, թե կազմավորումը բաղկացած է տարբեր երկրներից ժամանած կամավորներից, որոնք տեղակայված են Ադրբեջանի տարածքին շատ մոտ։ Ադրբեջանական ապատեղեկատվությանը ՈՄԱ-ում ծիծաղով են վերաբերվում։ Այս մասին Factor TV-ին ասաց ՈՄԱ-ի դասընթացները համակարգող Անգին Խաչատրյանը։
Այս օրերին ՈՄԱ-ում կամավորների համար արագընթաց դասընթացներ են կազմակերպում, բացակայելն արգելված է, չի կարելի նաև ուշանալ։ Առավոտյան 9-ից մինչև երեկոյան 18։00-ն հարյուրավորները մեկ մարդու նման սովորում են ողջ մնալ։ Նրանց մեջ մեծաթիվ են սփյուռքից հայրենիք վերադարձածները․ եկել են սահման գնալու համար։
Կռիվ գնալու համար կռիվ տվող աղջիկներն էլ են շատ։ 32-ամյա Անահիտ Հայրապետյանը 8 տարի է՝ մանկապարտեզում է աշխատում, բայց արդեն 8 օր է՝ ՈՄԱ-ում է։ Զենքի հետ առաջին ծանոթությունը հենց այստեղ է եղել։
Ոչ թե սովորել, այլ սովորածը վերհիշել։ Շատերը ՈՄԱ-ում են, որ պատերազմի դաշտում ոչ թե խնդիրներ ստեղծեն, այլ խնդիրներ լուծեն։
Այն, ինչ մարտադաշտից 300 և ավելի կմ հեռու համարվում է մանրուք, ճակատամարտում կարող է լինել որոշիչ։ Պատերազմում մանրուքներ չեն լինում, ասում է հրահանգիչներից Արամ Աբաջյանը։ Փորձառու հրահանգչին տարիների փորձն անգամ չի խանգարում ամեն օր զարմանալ՝ թե՛ առաջնագծում տեսած հերոսություններից, թե՛ այստեղ՝ թիկունքում նոր հերոսություններ անելու պատրաստակամություն հայտնողներից։
Ադրբեջանական կեղծ լուրերում նորաստեղծ համարվող այս կազմակերպությունը հիմնադրվել է 2014 թվականին, առաջին հետախուզադիվերսիոն խմբի հիմնադիր Վովա Վարդանովի կողմից, և ոչ թե Արցախում, ինչպես ադրբեջանական դատախազությունն է պնդում, այլ Հայաստանի Հանարապետությունում։
Ի դեպ, ադրբեջանական աղբյուրներում հրապարակված լուսանկարները, որոնք, իբր, ապացուցում էին նորաստեղծ ահաբեկչական խմբավորման գործողությունները Արցախում, իրականում արվել էին 2017 թվականին՝ հերթական վերապատրաստման ժամանակ։ Ի պատասխան՝ ՈՄԱ-ն հայտարարում է, որ ընդլայնում է սահմանները։ Արդեն մասնաճյուղ ունեն Հրազդանում, շուտով կունենան նաև Աբովյանում։
Մանրամասները՝ տեսանյութում։
Իրինա Մկրտչյան
