Հովհաննես Հարությունյանն առողջական լուրջ խնդիրներին զուգահեռ, պահվում է վատ պայմաններով խցում. պաշտպանն ահազանգում է

«Սասնա ծռերի» անդամ Հովհաննես Հարությունյանն արդեն 17 ամիս է, ինչ վիրավորում է ստացել, սակայն անհրաժեշտ բուժում, մինչ օրս չի իրականացվել, Factor.am- ին ասաց Հարությունյանի պաշտպան Հայարփի Սարգսյանը. «Առողջական խնդիրներին զուգահեռ, նա պահվում է շատ վատ պայմաններով, խոնավ խցում: Դա «Նուբարաշեն» ՔԿՀ-ի բուժմասն է, սակայն այնտեղ ոչ բժիշկներ կան, որ ցավազրկեն, ոչ էլ անհրաժեշտ պայմաններ»:

Հայարփի Սարգսյանը նշեց՝ լինում են դեպքեր, երբ անգամ ցավազրկողներ չեն տրամադրվում իր պաշտպանյալին. «Ես կարծում եմ՝ սա խոշտանգում է: Նրան այդ պայմաններից հանելու մտադրություն իրավասու մարմինները չունեն: Ինչպե՞ս կարելի է նման ցավերի դեպքում մարդուն անհրաժեշտ վերահսկողության չարժանացնել: Ժամը վեցից հետո ՔԿՀ-ում այլևս բժիշկներ չեն լինում, շաբաթ, կիրակի օրերին՝ ևս: Որևէ մեկը չի կարող այնպես անել, որ իր ոտքը վեցից հետո չցավի, որովհետև ցավազրկողներ չեն տրամադրվելու»,- ասաց փաստաբանը:

Նա նշեց՝ երեկ դատական նիստի ընթացքում փորձել է իր պաշտպանյալի առողջական վիճակի մասին հայտարարություն անել, սակայն դատավորը թույլ չի տվել. «Հովհաննեսին հիվանդանոցային պայմաններում բուժում է անհրաժեշտ: Երեկ նույնիսկ ռենտգեն լուսանկարն էի դատարանում ներկայացնում և անգամ բժիշկ չլինելով էլ երևում էր, որ ծնկի ոսկորի մի մասը պոկված է և շարժվում է»,- հավելեց նա:

Հայարփի Սարգսյանը նաև տեղեկացրեց՝ Հայաստանում այլևս չի մնացել որևէ գերատեսչություն որին դիմած չլինի իր պաշտպանյալի խնդրով, սակայն որևէ արձագանք չեն ստանում:

Նշենք, որ Հովհաննես Հարությունյանը ծնկի վիրավորում էր ստացել ՊՊԾ գնդի գրավման օրերին: Նրան մեղադրանք է առաջադրվել ՀՀ քրեական օրենսգրքի 219 րդ հոդվածի 3-րդ մաս 1-ին կետով և 235 հոդվածի 3-րդ մասով, այն է՝ ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը կազմակերպված խմբի կողմից: Հովհաննեսն իրեն առաջադրված մեղադրանքները չի ընդունում։

Լիլիթ Շաբոյան