«Մենք մեր պետության թշնամին չենք»․ դատապարտյալները ցանկանում են ռազմաճակատ գնալ. ՏԵՍԱՆՅՈՒԹ

Դեռևս պատերազմի առաջին օրերին Factor.am-ին էին դիմել դատապարտյալներ՝ նշելով, որ ցանկանում են կամավորագրվել և առաջնագիծ գնալ։ Նրանցից շատերի դիմումներին, սակայն մինչ օրս արձագանք չեն ստացել։

Այսօր ԱԺ-ում այս թեմային անդրադարձավ արդարադատության նախարար Ռուստամ Բադասյանը՝ ասելով, որ որոշակի պրոցեսներ ընթանում են։

Դատախազությունից մեզ հայտնեցին, որ ռազմաճակատ մեկնելու ցանկություն հայտնած կալանավորված 12 անձի խափանման միջոց փոխվել է անազատության հետ չկապված այլ խափանման միջոցով: «Նման ցանկություն հայտնած 9 դատապարտյալ, որոնք համապատասխանել են օրենքով սահմանված չափանիշներին, պայմանական վաղաժամկետ ազատ են արձակվել՝ առաջնագիծ մեկնելու համար»,- ասված է պատասխանում:

Մեր հարցին, թե ինչպես է կատարվում դիմում գրած դատապարտյալների միջև ընտրությունը, ինչպես է որոշվում ում դիմումն է բավարարվում, ումը՝ չէ, Դատախազությունից պատասխանեցին․ «Չափազանց զգույշ և անհատական մոտեցում է ցուցաբերվում դիմումների ընթացքը որոշելիս, յուրաքանչյուր դիմում քննարկման առարկա է դառնում անհատական կարգով՝ վստահ լինելու համար, որ նախ իրավիճակը չի ծառայեցվում ազատության մեջ հայտնվելու անձնական շահերի համար և որ Զինված ուժերին միանալու դեպքում նվազագույնի հասցված կլինեն հանցավոր վարքագծի ռիսկերը»:

Factor.am-ի հետ զրույցում դատապարտյալներից մեկը, որի տվյալները հրապարակել չենք կարող, ասաց՝ իրենք ռազմաճակատ մեկնելու դիմում են ներկայացրել հենց պատերազմի առաջին օրերին, բայց մինչ օրս պատասխան չեն ստացել:

Դատապարտյալը նշեց ՝ գուցե Քրեական օրենսգրով իրենք հանցագործներ են համարվում, բայց հայրենիքը մեկն է և բոլորինը: «Դա իսկական մեր տեղն ա, մենք ճիշտ ա, կարող ա օրենսգրքով հանցագործներ ենք, բայց մենք մեր պետության թշնամին չենք, Հայրենական պատերազմից էլ մեծ պատերազմ ա սա էլի ․․․»,- ասաց նա։

Դատապարտյալը շեշտեց՝ իրենք ոչ թե այսկերպ փորձում են կալանքից ազատվել, այլ թշնամու դեմ միասնական պայքար մղել: «Մենք մի տարի, երկու տարի հետո ազատվելու ենք, սենց թե նենց, ստեղ ազատության խնդիրը չէ, եթե մենք ազատվենք ու հայրենիք չունենանք էդի չգիտեմ ․․․․ ցանկացած հայի էլ պարզ ա թուրքի մտադրությունը, նրանց ուզածը միայն Արցախը չի, իրանք Սյունիքն են ուզում, որ մտնեն Նախիջևան, բայց իրանք չեն կարա»,- նշեց մեր զրուցակիցը։

Նշենք, որ դատապարտյալներին զորակոչելու հատուկ իրավակարգավորումներ օրենքով կամ «ՀՀ-ում ռազմական դրություն հայտարարելու մասին» Կառավարության որոշմամբ նախատեսված չեն: Գործընթացը տեղի է ունենում Դատախազության միջնորդությունների և դատարանների որոշումների հրիման վրա։

Մանրամասները՝ տեսանյութում։

Լիլիթ Շաբոյան