Հայկական կողմը հերքում է այն պնդումները, որ թուրք-ադրբեջանական կողմի ահաբեկչական գործողությունները հակազդելու նպատակով Ադրբեջանի Բարդա քաղաքը հրթիռակոծել է միջազգային կոնվենցիաներով արգելված կասետային զինատեսակներով: Նման պնդում կատարել է Amnesty իրավապաշտպան կազմակերպությունը:
Հոկտեմբերի 29-ին կատարած հրապարակմամբ Amnesty Internationa-ը հայտնում է, որ իբր հոկտեմբերի 28-ին «Սմերչ» կասետային հրթիռներ են արձակվել Բարդա՝ հարվածելով հիվանդանոցին հարող բնակելի թաղամասին:
Amnesty International-ը հղում անելով Ադրբեջանի գլխավոր դատախազությանը հայտնում է նաև, որ առնվազն 21 մարդ է զոհվել, ևս 70-ը վիրավոր են:
Պաշտպանության նախարարության ներկայացուցիչ Արծրուն Հովհաննիսյանը Factor TV-ի եթերում անդրադառնալով Amnesty International կազմակերպության հրապարակմանը նշեց, որ նախ՝ հայկական զինուժը Բարդայում լեգիտիմ խոցման մի քանի ռազմական կառույց է ներկայացրել, բայց Բարդան կասետային հրթիռներով չի խոցվել։ Անդրադառնալով Արծրուն Հովհաննիսյանի նշած Բարդայում առկա ռազմական օբյեկտներին, հիշեցնենք, որ Պաշտպանության նախարարությունը հոկտեմբերի 29-ին հրապարակեց Ադրբեջանի Բարդա քաղաքում տեղակայված լեգիտիմ ռազմական նշանակետերը, որոնք են՝
Վերանորոգման գումարտակ,
Կապի առանձին գումարտակ,
Զենիթահրթիռային դիվիզիոն,
Տանկային բրիգադ,
Հակատանկային դիվիզիոն:
Պաշտոնական Ստեփանակերտը հերքում է Amnesty International-ի պնդումները: Արցախի նախագահի խոսնակ Վահրամ Պողոսյանը Factor TV-ին փոխանցեց՝ հայկական զինուժը ադրբեջանական որևէ բնակավայր չի թիրախավորել: Վահրամ Պողոսյանը միաժամանակ հայտնեց, որ հայկական կողմը մշտապես է հորդորում ադրբեջանական ռազմական օբյեկտներին մոտ գտնվող խաղաղ բնակիչներին լքել իրենց բնակավայրերը, որպեսզի զերծ մնան քաղաքացիական կորուստներից: Վահրամ Պողոսյանը Amnesty International-ի հրապարակումը որակում է որպես միակողմանի կատարված աշխատանք:
«Հայաստանն ու Արցախը երբեք չեն դիտարկվել, որպես կասետային զինատեսակներ կուտակող երկրներ»,- հիշեցնում է Ազգային ժողովի պետական-իրավական հարցերի մշտական հանձնաժողովի նախագահ Վլադիմիր Վարդանյանը և այս առթիվ հայտնում իր զարմանքը:
Վլադիմիր Վարդանյանը նշում է՝ նման հրապարակումներով պաշտոնական Բաքուն փորձում է միջազգային հանրության ուշադրությունից շեղել իր իսկ կողմից հայկական բնակավայրերը հրթիռակոծելու դեպքերը:
Amnesty International-ի այս հրապարակմանը զուգահեռ բազմաթիվ են այն փաստերն ու հրապարակումները, որ Ադրբեջանն Արցախի խաղաղ բնակչության դեմ արգելված զենք է կիրառում: ԱՀ արտակարգ իրավիճակների պետական ծառայությունը հոկտեմբերի 20-ին լուսանկարներ էր հրապարակել, որոնք ապացուցում են այս պնդումը։ Ստեփանակերտից ոչ հեռու հայտնաբերվել էր Ադրբեջանի կողմից արձակված կասետային հրթիռ՝ 260-ից ավելի պայթած ու չպայթած բեկորային ռումբերով, որը միջազգային բոլոր կոնվենցիաների դրույթներով արգելված է կիրառել խաղաղ բնակչության դեմ: Լեռնային Ղարաբաղի խաղաղ բնակչությանը և բնակավայերը միջազգային կենվենցիաներով արգելված զինատեսակներով ռմբակոծելու փաստն արձանագրել է նաև միջազգային հեղինակավոր Human Rights Watch իրավապաշտպան կազմակերպությունը:
Մանրամասները՝ տեսանյութում:
Նարեկ Կիրակոսյան
