Զորամասը լքելու, հրամանը չկատարելու, դասալքության համար սահմանված պատժաչափերը խստացվեցին․ ԱԺ-ն նախագիծն ընդունեց ամբողջությամբ

ՀՀ Ազգային ժողովը երկրորդ ընթերցմամբ և ամբողջությամբ ընդունեց Կառավարության կողմից ներկայացված ՀՀ քրեական օրենսգրքում փոփոխություններ կատարելու մասին օրենքի նախագիծը, որով նախատեսվում է ռազմական դրության, պատերազմի կամ մարտական գործողությունների ժամանակ քրեական մի շարք հանցանքների համար սահմանել առավել խիստ պատժաչափեր:

Նախագիծն ԱԺ արտահերթ նիստում ստացավ 69 կողմ ձայն:

Այսպիսով՝ ժամկետային զինվորական կամ այլընտրանքային ծառայությունից, վարժական հավաքներից կամ զորահավաքներից խուսափելը կպատժվի 6-12 տարի ազատազրկմամբ, նախկինում նախատեսված 4-8 տարվա փոխարեն:

Զինվորական հնազանդությունից կամ պատերազմի ընթացքում հարկեր վճարելուց խուսափելու առավելագույն պատիժը սահմանվել է 1-5 տարի ազատազրկում՝ 4 տարվա փոխարեն։

Պատերազմում հրամանը չկատարելու համար պատիժը 5-15 տարվա ազատազրկումից կփոխվի 8-15 տարվա ազատազրկման:

Ռազմական դրության, պատերազմի ժամանակ կամ մարտական իրավիճակում կատարված դասալքությունը կպատժվի 8-15 տարվա ազատազրկմամբ՝ նախկինում հաստատված 6-12 տարվա փոխարեն:

Ազատազրկման ձևով պատիժը կրելուց հետո զինվորական կոմիսարիատ ներկայանալուց խուսափելու համար սահմանել է նվազագույն աշխատավարձի 200-600-ապատիկի չափով, կամ կալանքով` առավելագույնը 3 ամիս ժամկետով, կամ ազատազրկմամբ` առավելագույնը 3 տարի ժամկետով պատիժ, իսկ ռազմական դրության, պատերազմի ժամանակ կամ մարտի պարագաներում նույն արարքի կատարման համար սսահմանել 2-6 տարի ժամկետով պատիժ: