Աշխարհը այսօր պետք է հասկանա, որ հային Արցախից հնարավոր չէ հանել. Արտո Թունջբոյաջյան

«Թուրքիան և Ադրբեջանը ստերով ու մանիպուլյացիաներով են առաջնորդվում: Աշխարհն այսօր կամ վաղը պետք է հասկանա, որ հային Արցախից հնարավոր չէ հանել: Էրդողանն ու Ալիևն իրենց ժողովրդին խաբում են աստծով, բայց իրենք աստված չունեն»,- Factor.am-ի հետ զրույցում նման տեսակետ հայտնեց ջազ և ֆոլք երաժիշտ Արտո Թունջբոյաջյանը՝ անդրադառնալով Ադրբեջանի և Թուրքիայի կողմից Արցախի հանդեպ սանձազերծած պատերազմին:

Նրա խոսքով՝ բոլոր հայերը, եթե նույնիսկ ֆիզիկապես հայրենիքում չեն, պետք է իրենց միտքը կենտրոնացնեն Հայաստանի վրա. «Երբ հայ ազգը միաբանվում է, առողջ միտք է ծնվում: Մեր երիտասարդ տղաները զոհվում են ոչ միայն հողի համար, այլև հանուն այդ մտքի գեներացման»:

Արտո Թունջբոյաջյանի համոզմամբ՝ պատերազմից առաջ և դրանից հետո պետք է ամբողջ ուշադրությունը կենտրոնացնել հզոր գիտություն, մշակույթ ստեղծելու վրա. «Հաղթանակը դա կլինի: Երիտասարդ սերնդին պետք է պլատֆորմ տրամադրել իրենց գաղափարներն իրականացնելու համար: Պետք է այնպես անել, որ երիտասարդը «փաթաթվի» իր երկրին: Հայը պետք է իր գործով հաղթի: Մեզ ապրող հերոսներ են պետք»:

Ի դեպ, Creative Armenia-ն և Հայկական Բարեգործական Ընդհանուր Միությունը կկազմակերպեն «Համերգ Արցախի համար» համաշխարհային երաժշտական միջոցառումը, որը կբարձրացնի իրազեկությունն ու կհավաքի հանգանակություններ Արցախի համար: Համերգին, որի պրեմիերան կկայանա հոկտեմբերի 26-ին, յություբյան և ֆեյսբուքյան ուղիղ եթերներում, կմասնակցեն Արտո Թունջբոյաջյանը, «Capital Cities»-ի Սեպուհ Սիմոնյանը, «System of a Down»-ի Սերժ Թանկյանը, սոպրանո Նատալի Արոյանը, ջութակահար Արա Մալիքյանը, , «Արցախի ձայներ»-ը, Արենի Աղբաբյանը և ուրիշներ:

Աննա Բաբաջանյան