«Հարգելի պատգամավորներ, հավեսով կոճակ սեղմողներ, ձեզ ո՞վ է պաշտպանելու, երբ հայտնվեք դատարանում»․փաստաբանը՝ նոր սանկցիայի մասին

Փաստաբան Նինա Կարապետյանցը Factor.am-ի հետ զրույցում, անդրադառնալով վաղը խորհրդարանում քվեարկության դրվող «Դատական նոր օրենսգրքին», որով նախատեսվում է մինչև 100 հազար դրամի սանկցիաներ կիրառել դատական նիստերի բնականոն ընթացքը խաթարող փաստաբանների նկատմամբ, այն գնահատում է որպես «փաստաբանների դեմ ճնշում»։

«Դատարանի հեղինակությունը չի բարձրանալու փաստաբաններին տուգանելով։ Սրա միակ նպատակը իրենց կարծիքն արտահայտող, չենթարկվող փաստաբաններին ճնշելն է»,-ասաց փաստաբանը։

Նրա համոզմամբ՝ նման սանկցիաներ կիրառելով, չաշխատող դատարանները, արդարադատության համակարգը «փորձելու են ինքնահաստատվել՝ փաստաբաններին ճնշելով, որը շատ բացասական տենդենց է»։

«Հարգելի պատգամավորներ, հավեսով կոճակ սեղմողներ, Ձեզ ո՞վ է պաշտպանելու, երբ հայտնվեք դատարանում»,- հարց ուղղեց փաստաբանը՝ զգուշացնելով․ «Երբ ժամանակը գա, որ իրենք հայտնվեն դատարանում, չի լինի էն փաստաբանը, որը կպայքարի իրենց խախտված իրավունքների համար»։

Նինա Կարապետյանցի խոսքով՝ առաջարկվող փոփոխությունը վերաբերում է յուրաքանչյուր քաղաքացու։ «Որովհետև ամենապարզ քաղգործով, եթե փաստաբանը փորձի ընդդիմանալ, դատավորը պատճառ կգտնի սանկցիա կիրառելու համար։ Դատարանը տուգանք կնշանակի փաստաբանին լռեցնելու համար»,- ասաց փաստաբանը։

Նրա խոսքով՝ եթե այսօր գործեր այդ սանկցիան, ապա ինքը մոտ 2 մլն դրամի չափ տուգանք պետք է վճարեր, փաստաբան Մուշեղ Շուշանյանը՝ մոտ 3 մլն-ի չափով, Արայիկ Պապիկյանը՝ մոտ 35 մլն դրամի չափով։

Մանրամասները դիտեք Նինա Կարապետյանցի հետ Factor.am-ի հարցազրույցում։

Մարինե Խառատյան