Շուշիի ռմբակոծությունից առաջ արված լուսանկարը վաճառվում է․ գումարը փոխանցվելու է բանակին. ՏԵՍԱՆՅՈՒԹ

Մինչ առաջնագծում թեժ մարտերը շարունակվում են անգամ մարդասիրական հրադադարի պայմաններում, թիկունքում՝ ով ինչպես և ինչով կարողանում է փորձում է օգտակար լինել։

Լուսանկարիչ Վահե Մելքոնյանը պատերազմի առաջին օրերից Արցախում է եղել, որ վաղն ու տարիներ հետո լուսանկարները լինեն այսօրվա վայրագությունների վկան, որ նաև ցույց տա՝ ավերակների կողքին էլ մեծացող մանկություն կա և կան բերք տվող այգիներ։

Վերջին կանգառն էր Շուշին, ռմբակոծությունից 6 օր առաջ էր։ Քաղաքի կենտրոնում գտնվող Ճերմակ Մայր տաճարը  ավելի էր ճերմակել:

Այսօր արդեն ավիրված եկեղեցին անգամ իր ավիրվելու արդյունքում կարող է օգնել։  Վահեն ասում է՝ տվյալ դեպքում ինքը միջնորդն է այդ օգնության։ Ռմբակոծվելուց օրեր առաջ արված եկեղեցու այս լուսանկարը տպելու և վաճառելու միտքը Հայաստանում է ծնվել՝ եկեղեցու ռմբակոծությունից օրեր անց։ 100 լուսանկար, յուրաքանչյուրը՝ 15․000 դրամ։ Գումարն ամբողջությամբ Հայաստան համահայկական հիմնադրամին է փոխանցվելու։ Ավելին՝ ինքներդ կարող եք փոխանցումն անել, նամակը ցույց տալ և նկարը ստանալ։

3 օր է, ինչ նախաձեռնությունը մեկնարկել է, իր և իր ստուդիայի ֆեյսբուքյան էջում է հայտարարությունը դրել, արդեն 20-ից ավելի լուսանկար վաճառվել է։ Նկարը ձեռք բերելու 6 նամակ էլ այսօր է ստացել։ Ասում է՝ հենց 100-ը վաճառվի՝ ևս 100 -ը կտպի՝ Սուրբ Ղազանչեցոց եկեղեցին  անգամ լուսանկարի տեսքով է բանակի թիկունքին՝ լուսավոր և ճերմակ:

Իրինա Մկրտչյան