17.10.2026 | 19:25
Հռոմի պապ Լևոն XIV-ը լքել է հիվանդանոցը՝ թոքի ուռուցքի հեռացման վիրահատությունից հետո
Թեև ադրբեջանական գործողությունների հետևում կանգնած է Թուրքիան, սակայն դրանց ռազմաքաղաքական հետևանքների պատասխանատվությունը կրելու է Ադրբեջանի ղեկավարությունը․ Մնացականյան. ՏԵՍԱՆՅՈՒԹ
Քաղաքականություն
16.10.2020 | 14:43
Շատ կարևոր է, որ մեր երկրները միջազգային օրակարգի բազմաթիվ հարցերի շուրջ ունեն համահունչ մոտեցումներ։ Հունաստանի ԱԳ նախարար Նիկոս Դենդիասի հետ համատեղ մամուլի ասուլիսի ժամանակ այս մասին հայտարարեց ՀՀ ԱԳ նախարար Զոհրաբ Մնացականյանը։
«Մեր հանդիպումը տեղի է ունենում մի իրավիճակում, երբ Արցախում մեր հայրենակիցները կանգնած են գոյութենական սպառնալիքի առջև։ Այս առումով ցանկանում եմ առանձնահատուկ շնորհակալություն հայտնել իմ հույն գործընկերոջը՝ այս կարևոր ժամանակաշրջանում Հայաստան այցելելու, իր համերաշխությունը հայ ժողովրդին հայտնելու գործում»,- ասաց Մնացականյանը։
Նրա խոսքով՝ երկու երկրների տարածաշրջանները՝ Արևելյանը, Միջերկրականը և Հարավային Կովկասը, ներկայում բախվում են նույն սպառնալիքին, որի հիմքում Թուրքիայի ծավալապաշտական քաղաքականությունն է։
«Սեպտեմբերի 27-ից մինչ օրս Արցախի խաղաղ բնակչության դեմ Ադրբեջանի ռազմաքաղաքական ղեկավարության կողմից սանձազերծված լայնածավալ ագրեսիայի հրահրողը և դրա իրականացման գործում ուղիղ ներգրավվածություն ունեցողը հենց Թուրքիան է։ Թուրքիան է՝ ոչ միայն իր ռազմական մասնակցությամբ, այլև վերջինիս ծառայության ներքո գտնվող օտարերկրյա զինյալ ահաբեկիչների ներգրավումով: Չնայած հոկտեմբերի 10-ին ընդունված նախարարական հայտարարությանը՝ կրակի դադարեցման վերաբերյալ, Ադրբեջանը շարունակել է մարտական գործողությունները՝ հարված հասցնելով նաև Հայաստանի տարածքում գտնվող ռազմական օբյեկտին։ Իսկ երեկ կրկին հրետակոծման է ենթարկվել Արցախի Հանրապետության մայրաքաղաք Ստեփանակերտը։ Այս ամենով Ադրբեջանը բացահայտորեն ի ցույց է դնում, որ ոչ միայն հրաժարվում է իրականացնել արտգործնախարարների համատեղ հայտարարությամբ հաստատվող կրակի դադարեցումը, այլ Թուրքիայի բացահայտ հրահրմամբ ձգտում է ընդլայնել, խորացնել ղարաբաղյան հակամարտության աշխարհագրությունը՝ արդեն նախահարձակ լինելով և բացահայտ ագրեսիա իրականացնելով ՀՀ ինքնիշխան տարածքի նկատմամբ»,- նշեց Զոհրաբ Մնացականյանը՝ հավելելով․ «Թեև ադրբեջանական գործողությունների հետևում կանգնած է Թուրքիան, սակայն դրանց ռազմաքաղաքական հետևանքների պատասխանատվությունը կրելու է Ադրբեջանի ղեկավարությունը»:
Մանրամասները՝ տեսանյութում:
