Հանուն զինվորների, մեր եղբայրների. երիտասարդներն անձրևանոցներ են պատրաստում և ուղարկում սահման. ՏԵՍԱՆՅՈՒԹ

Երևանի թատրոնի և կինոյի պետական ինստիտուտի մի հատված 13 օր է՝ վերածվել է կարի փոքրիկ արտադրամասի: Թատերականի տասնյակ ուսանողներ, ինչպես նաև՝ այլ կամավորներ առավոտից երեկո ադրբեջանաթուրքական ահաբեկչական ագրեսիայի դեմ պայքարող զինվորների համար անձրևանոցներ են պատրաստում: Միտքը ծագել է ինստիտուտի 4-րդ կուրսի ուսանողուհի Լիլիթ Հովհաննիսյանի մոտ այն բանից հետո, երբ համացանցում կարդացել է, որ զինվորներին անձրևանոցներ են անհրաժեշտ: «Առաջին 23 օրինակը ես ու ընկերս տան պայմաններում ենք արել, հետո մեզ միացել են համակուրսեցիներ: Թատերականը տրամադրել է տարածքը: Հիմա օրական 60-ից 80 հոգի կամավորներ են մոտենում, սիրով օգնում»,- ասաց նա:

Լիլիթի թիմի համար այս պահին միակ խնդիրը հումքի ձեռքբերումն է. «Եթե ուզում ենք ապահովել շատ քանակ, իսկ օր է եղել, որ մենք 750-800 հատ արտադրել ենք, դրա համար մեզ օրական 140-150 հազար դրամ գումար է պետք: Աջակցություն լինում է, բայց հումքը գրեթե միշտ խնդիր է»:

Չնայած սրան՝ երիտասարդներն ամեն ինչ անում են, որպեսզի աշխատանքը կանգ չառնի: Իսկ երբ անձրևանոցները նախնական տեսք են ստանում՝ Լիլիթի ընկերը՝ Միքայելը, սիրով փորձում է, վերջին շտկումներն արվում են՝ զինվորներին ուղարկելուց առաջ: Միքայելն ինքն էլ Թատերականի ուսանողներից է, Ապրիլյան քառօրյա պատերազմի մասնակից: Առայժմ թիկունքից է օգնում, թեև պատրաստ է ամեն պահի առաջնագիծ մեկնել: «Թող առաջնագծում մեր զինվորներն իմանան, որ թիկունքն ամուր է, իրենք կողքին կանգնած ենք, սպասում ենք մեր հերթին և ուրախ ենք իրենց սխրանքներով»,-ասաց Միքայել Սարգսյանը:

Երիտասարդներն ի սկզբանե աշխատել են միայն պոլիէթիլենային տոպրակներով, այժմ նաև կտորե հումք ունեն: Այս ընթացքում մոտ 4000 անձրևանոց են ուղարկել առաջնագիծ. օրական պատրաստվում է 300-ից մինչև 800 անձրևանոց: Երբ համոզվում են, որ զինվորի բաժինը տեղ է հասել՝ հասկանում են՝ աշխատանքն իր նպատակին ծառայել է և ավելի մեծ թափով լծվում գործի:

Մանրամասները՝ տեսանյութում:

Մերի Մարտիրոսյան