Սննդամթերքը սեպտեմբերին, օգոստոսի համեմատ, էժանացել է, նախորդ տարվա սեպտեմբերի համեմատ՝ թանկացել

Հայաստանում այս տարվա սեպտեմբերին, նախորդ տարվա նույն ամսվա համեմատ, սննդամթերքի և ոչ ալկոհոլային խմիչքների գներն աճել են 0․8%-ով։ Այս մասին Factor.am-ը տեղեկանում է Պետական վիճակագրական ծառայության հրապարակած տվյալներից։

Թանկացում է նկատվում մրգի ապրանքաշուկայում՝ 20․1%-ով, հացաբուլկեղենի և ձավարեղենի ապրանքաշուկայում՝ 3,8%-ով։ Մասնավորապես թանկացել են ալյուրը և ձավարեղենը՝ 11․1%-ով, հացը՝ 1․9%-ով, մակարոնեղենը՝ 4․7%-ով, բրինձը՝ 7%-ով։

Կաթնամթերքի շուկայում, ընդհանուր առմամբ, գրանցվել է 0․4% գների աճ։ Մասնավորապես՝ կաթը թանկացել է 1․3%-ով, յոգուրտն ու մածունը՝ 2․9%-ով, պանիրը և կաթնաշոռը՝ 1․1%-ով, իսկ ձուն էժանացել է 3․7%-ով։

Բանջարեղենի շուկայում գնաճը կազմել է 6․9 %։ Մասնավորապես՝ թանկացել է կարտոֆիլը՝ 29%-ով, պահածոները և մշակված բանջարեղենը՝ 7․3%-ով։ Թանկացել են նաև շաքարավազը՝ 6․4%-ով, հրուշակեղենը՝ 1․4%-ով, հանքային կամ աղբյուրի ջուրը՝ 1․3%-ով։

Որոշ ապրանքատեսակների մասով էլ գների նվազում է գրանցվել։ Գնանկում է արձանագրվել մսամթերքի շուկայում՝ 3․3%-ով․ մասնավորապես՝ խոզի միսը՝ 5․5%-ով, տավարի միսը՝ 3%-ով, թռչնամիսը՝ 9%-ով, իսկ գառան, ոչխարի և այծի միսը թանկացել է 4․4%-ով։ Ձուկն ու ծովամթերքն էժանացել են 4․2%-ով, շոկոլադը՝ 5․5%-ով։

Իսկ այս տարվա օգոստոսի համեմատ՝ սննդամթերքի և ոչ ալկոհոլային խմիչքների շուկայում սեպտեմբերին 0․8%-ով գնանկում է արձանագրվել։ Մասնավորապես՝ միրգն էժանացել է 9․9%-ով, բանջարեղենը՝ 4․8%-ով։

Անժելա Պողոսյան