«Որդի ես ունեցել». բարի լուրը հասել է առաջնագիծ. ՏԵՍԱՆՅՈՒԹ

«Շենգավիթ» ԲԿ-ում այս օրերին արցախցի 3 տղա է ծնվել։ Այսօր Factor TV-ն այցելել է նորածիններին, զրուցել մայրիկների հետ։

25 տարեկան Ալիսայի երկրորդ որդին է Արարատը, մեծը 2 տարեկան է։ Անհամբեր եղբոր հետ հանդիպման է սպասում։ Մանկաբարձ-գինեկոլոգ Անի Բաբելյանը պատմում է՝ նախորդ օրերին մայրիկն ավելի վատ է եղել։ Հիմա արդեն հեգեպես համեմատաբար հանգիստ է։

Արարատի հայրիկի անունն էլ է Արարատ, դիրքերում է հիմա։ 4 օր կապ չլինելուց հետո այսօր իմացել է՝ որդի է ունեցել։

Արցախցի նորածիններից մեկն էլ Արայիկն է։ Հադրութից է հասել Երևան։ Մայրիկի՝ Հերմինեի եղբայրները, հայրը հիմա էլ դիրքերում են՝ առաջին գծում։ Հերմինեն ասում է՝ հոր հետ վերջապես կարողացել է խոսել այսօր, ասել է՝ առաջին գիծն ամուր է, չմտածես, առաջին թոռանս դու լավ նայի։

Փոքրիկին լույս աշխարհ գալուց օգնել է մանկաբարձ-գինեկոլոգ Ռուբեն Թևոսյանը։ Ասում է՝ մայրն էլ, փոքրիկն էլ լավ են։

Բժիշկը հիշում է՝ նույն ապրումները 2 ամիս առաջ է ունեցել՝ հուլիսին, երբ էլի իր օգնությամբ տավուշցի եռյակ ծնվեց՝ երկու տղա և 1 աղջիկ։

Այդ օրերին էլ, հիմա էլ շատերն են գալիս «Շենգավիթ»՝ ինչ-որ բանով օգնելու, ինչ-որ մի բան նվիրելու համար։ Բժշկական կենտրոնում վստահեցնում են՝ փոքրիկներն ու նրանց մայրիկներն ապահովված են ամեն ինչով։ Ոչ մի բանի կարիք չունեն նաև բուժկենտրոնում այս օրերին բուժում ստացող մյուս վիրավորները։ Նրանց հետ զրուցել չենք կարող, բայց վիճակի մասին մանրամասներ կենտրոնի բուժգծով փոխտնօրեն Դավիթ Մխիթարյանը մեզ փոխանցեց։

Միակ բանը, ինչի կարիքը հիմա կա, հաղթանակն է, որ Արարատը, Արայիկը և մյուս բոլոր նորածիններն ու ծնվել պատրաստվող փոքրիկներն այլևս կարիք չունենան ապրել ապաստարաններում։

Մանրամասները՝ տեսանյութում։

Իրինա Մկրտչյան