Հասարակություն
29.09.2020 | 18:37
Գյումրիում քաղաքացիները «Ես Արցախն եմ․ Շիրակ» քաղաքացիական նախաձեռնություն են ձևավորել, որի նպատակն Արցախ օգնություն ուղարկելու գործընթացը համակարգված կազմակերպելն է։ Ինչպես Ապրիլյան պատերազմի օրերին՝ այս անգամ ևս նախաձեռնության հասցեն Հայորդաց տունն է, ուր քաղաքացիները բերում են իրենց օգնությունը՝ առաջին անհրաժեշտության ապրանքների, սննդի, դեղորայքի, հագուստի տեսքով։
«Նպատակն է, որ այն մարդիկ, ովքեր ցանկություն ունեն, իսկ նրանց թիվը բավական մեծ է, ովքեր ուզում են ինչ-որ կերպ օգտակար լինել սահմանին՝ առաջին անհրաժեշտության ապրանքով, սնունդով, դեղորայքով և այլն, հնարավորություն տանք այս ձևաչափով կարողանալ իրենց ներդրումն ունենալ»,- Factor.am-ի հետ զրույցում ասաց «Ես Արցախն եմ․ Շիրակ» նախաձեռնության անդամ Ղարիբ Հարությունյանը։
Նա նշեց, որ նախաձեռնությունը համագործակցում է Շիրակի մարզպետարանի հետ և դասակարգելով օգնությունը՝ ուղարկում ըստ անհրաժեշտության։
«Իհարկե, մեր բանակը դրա կարիքը չունի, որովհետև այսօր մեր բանակը հզոր է, այն, ինչ պահանջվում է, ունի, բայց մենք էլ լրացուցիչ թիկունքից օգնում ենք իրենց։ Նայում ենք՝ ինչի կարիք կա, այն մարդիկ, ովքեր գնում են կամավոր կամ այլ կերպ իրենց անհրաժեշտ իրեր ենք տալիս։ Վետերան ազատամարտիկների միությունից են գնացել, իրենց էլ արկղեր տրամադրեցինք»,- ասաց Ղարիբ Հարությունյանը։
Երեկվանից քաղաքացիների հոսքը Հայորդաց տուն չի դադարում։ Քաղաքացիներն արկղերով ու տոպրակներով բերում են իրենց օժանդակությունը։
«Աջակցում են՝ դպրոցականներից սկսած։ Եկել էին մի քանի դպրոցականներ, ասում են՝ դպրոցներով, դասարաններով հավաքել ենք, ինչ-որ իրեր ենք բերելու։ Նաև բիզնես կառույցներ են միացել, օրինակ՝ «Լենտեքսը» մեծ քանակով հագուստ է տրամադրել։ Տարբեր մարդկանց ու կազմակերպությունների հոսք է»,- եզրափակեց Ղարիբ Հարությունյանը։
Էմմա Չոբանյան
