Թուրքիան ոչ պաշտոնապես Ղարաբաղի պատերազմի մեջ է մտել․ «Նեզավիսիմայա գազետա»

Ռուսական «Նեզվիսիմայա գազետան» հոդված է հրապարակել  Լեռնային Ղարաբաղում տեղի ունեցող մարտական գործողություններում Թուրքիայի անմիջական ներգրավվածության մասին։

Հոդվածագիրը նշում է, որ Հայաստանի խորհրդարանը սեպտեմբերի 28-ին, այլ հարցերի հետ մեկտեղ, քննարկել է նաև Լեռնային Ղարաբաղի պատերազմին Թուրքիայի փաստացի մասնակցության հարցը։ Ստեփանակերտում էլ այդ մասին հայտարարել է ԱՀ նախագահ Արայիկ Հարությունյանը՝ ասելով, որ դեռ չճշտված տեղեկատվությամբ՝ հայկական ուժերը թուրքական կործանիչ են խոցել։

Թուրքիայի նախագահ Ռեջեփ Թայիփ էրդողանն էլ երկուշաբթի բացահայտ հայտարարեց, որ «Հարավային Կովկասում Հայաստանը խաղաղության միակ խոչընդոտն է»։ Էրդողանը նաև հայտարարել է, որ «Հայաստանը պետք է անհապաղ հեռանա ադրբեջանական հողերից, որոնք 30 տարի «օկուպացրել» է»։

Ըստ հրապարակման՝ կրակի վրա յուղ են լցնում նաև թուրքական իշխանամետ ԶԼՄ-ը, որոնք Էրդողանին կոչ են անում ավիացիոն հարցված հասցնել Երևանին ու այդպիսով խնդիրը լուծել։

Բացի այդ, լրատվամիջոցը մեջբերում է Թուրքիայի պաշտպանության նախարար Հուլուսի Աքարի խոսքերը, որ Ղարաբաղում խաղաղություն ու կայունություն հնարավոր է միայն «Ադրբեջանի տարածքային ամբողջականության վերականգնման դեպքում»։

Ռուսական լրատվամիջոցը գրում է նաև, որ Ղարաբաղյան պատերազմում Թուրքիայի ներգրավվածությունն ավելի մեծանում է։ Խոսքը ոչ միայն զինատեսակների, այդ թվում՝ անօդաչու թռչող սարքերի ու ռազմական ինքնաթիռների մասին է, այլ նաև հրահանգիչների ու վարձկանների։

«ՆԳ»-ի լավատեղյակ աղբյուրի տեղեկություններով՝ սեպտեմբերի 27-ի երեկոյան հայկական կողմից գերեվարվել է օտարերկրացի, որը կռվել է ադրբեջանական ստորաբաժանման մեջ։ Շարքային վարձկան գրոհայինը կա՛մ մասնակցել է սիրիական պատերազմին, կա՛մ թուրք հրահանգիչ է, ասել է «ՆԳ»-ի աղբյուրը։

Միաժամանակ, Հայաստանի ԱԳՆ-ն Լեռնային Ղարաբաղի իրավիճակի շուրջ հայտարարության մեջ նշում է պատերազմին Թուրքիայի մասնակցությունն ադրբեջանական կողմից։ Ըստ հրապարակման՝ նման մեղադրանքներ, առանց համոզիչ ապացույցների, հազիվ թե հնչեն։

Լրատվամիջոցը նաև նշում է, որ եթե Թուրքիան օգնում է Ադրբեջանին, ապա Հայաստանին օգնելու պատրաստակամություն է հայտնել Հունաստանը։ Հայաստանը, սակայն, առայժմ հրաժարվում է առաջարկվող օգնությունից՝ հույսը դնելով սեփական ուժերի վրա։ Մասնավորապես, ՌԴ-ում Հայաստանի դեսպան Վարդան Տողանյանը նշել է, որ լրացուցիչ ռազմական օգնության անհրաժեշտություն դեռ չկա։

Էմմա Չոբանյան