Ռուսաստանը կմիջամտի, եթե ռազմական գործողությունները անկառավարելի դառնան․ Նավասարդյան. ՏԵՍԱՆՅՈՒԹ

Ռուսաստանը կմիջամտի, եթե ռազմական գործողությունները անկառավարելի դառնան։ «Պատերազմ Արցախում․ ռազմական բախման արտաքին և ներքին գործոնները» թեմայով քննարկման ժամանակ այսպիսի տեսակետ հայտնեց Երևանի մամուլի ակումբի նախագահ Բորիս Նավասարդյանը:

Նրա խոսքով՝ միջազգային հանրության ազդեցությունն այսպիսի հակամարտությունների վրա առնվազն վերջին վեց տարիներին թուլացել է, ուստի չպետք է ակնկալել, որ որևէ գործուն մեխանիզմ կձեռնարկվի միջազգային կազմակերպությունների, այդ թվում՝ նաև Մինսկի խմբի համանախագահների կողմից, բայց առանձին երկրներ, որոնք ռեսուրսներ և ազդեցություն ունեն տարածաշրջանում ընթացող իրադարձությունների վրա, իհարկե՝ կարող են ազդեցություն գործել և՛ Հայաստանի, և՛ Ադրբեջանի վրա: Խոսքը վերաբերում է Ռուսաստանին և Թուրքիային:

«Թուրքիան առաջին անգամ հանդես է գալիս որպես կոնֆլիկտի կողմ: Թուրքիան ղարաբաղյան կոնֆլիկտի ամբողջ պատմության մեջ առաջին անգամ է բացահայտորեն պաշտպանում, աջակցում Ադրբեջանին պատերազմական գործողություններում, նույնիսկ հայտարարություն հնչեց, որ նրանք ռազմական գործողությունները կդադարեցնեն միայն Լեռնային Ղարաբաղի «ազատագրումից» հետո: Ի՞նչ կարող է անել Ռուսաստանը։ Պետք է սպասել, որ ուժերի հավասարակշռությունը խախտվի, և կողմերից մեկի ռազմական գործողությունները հաջողություններ գրանցեն, միայն այդ ժամանակ կարելի է ակնկալել Ռուսաստանի քաղաքական ղեկավարության կողմից ավելի խիստ միջամտություն իրավիճակին»,- նշեց Բորիս Նավասարդյանը:

Մանրամասները՝ տեսանյութում: