Գագիկ Ծառուկյան, Սերժ Սարգսյան, Արթուր Վանեցյան. ձերբակալվելու պատրաստ պաշտոնյաների ցանկը համալրվում է. ԵզրաԿԱՑՈՒԹՅՈՒՆ

ԱԱԾ-ի կողմից ընտրակաշառք բաժանելու համար մեղադրվող Գագիկ Ծառուկյանն այսօր հայտարարեց, որ պատրաստ է ձերբակալության, եթե դրանով երկրում առկա օրակարգային խնդիրները կլուծվեն:

«Եթե այսօր Ծառուկյանին ձերբակալելով ժողովրդի սոցալական, տնտեսական վիճակը կլավանա, աշխատավարձը կավելանա, ասենք թե հարկային պարտավորությունները կնվազեն, չգիտեմ՝ ժողովրդի տոկոսները կիջնեն, ուսման վարձերը կնվազեն, ապա հարց չկա»,- ասաց նա:

Նախորդ տարի նմանատիպ հայտարարություններ էին արել նախկին բարձրաստիճան պաշտոնյաներ, որոնք անցնում են այլ քրեական գործերով:

ՀՀ երրորդ նախագահ, ՀՀԿ նախագահ, շուրջ կես միլիարդ դրամ գումարի հափշտակության կատարումը կազմակերպելու համար մեղադրվող Սերժ Սարգսյանն իր հավանական ձերբակալության մասին ասել էր․ «Եթե ինձ ձերբակալելով մեր ժողովուրդը գոհ ու երջանիկ կլինի, եթե ինձ ձերբակալելով Մարտի 1-ը, Հոկտեմբերի 27-ը կհամարվեն ամբողջովին բացահայտված, մեր երկրին սպառնացող վտանգները կչեզոքանան, ԼՂ բանակցությունները կվերադառնան ճիշտ ուղի, թող ձերբակալեն»:

ՀՖՖ նախկին նախագահ, ՀՀԿ-ական նախկին պատգամավոր, 2․7 մլն դոլարի յուրացման համար կասկածվող Ռուբեն Հայրապետյանն էլ իր ձերբակալության մասին նշել էր. «Եթե ինձ ձերբակալելով մեր հավաքականը չի պարտվելու, խնդիր չկա, թող ձերբակալեն»:

Իսկ ահա ԱԱԾ նախկին տնօրեն, ՀՖՖ նախկին նախագահ Արթուր Վանեցյանը Factor.am-ի հարցին՝ արդյո՞ք իրեն կձերբակալեն, պատասխանել էր. «Եթե իմանամ՝ ինչի համար են ձերբակալում, թող ձերբակալեն»:

Մանրամասները՝ տեսանյութում:

Նարեկ Կիրակոսյան