01.07.2026 | 02:54
ԱԱ-2026. Ֆրանսիան խնդիրներ չունեցավ, Մբապեի դուբլը. ՏԵՍԱՆՅՈՒԹ
Կրակոցներ Այգեպարում նկարահանման պահին. Տավուշը հուլիսյան հրետակոծություններից 2 ամիս անց. ՏԵՍԱՆՅՈՒԹ
Հասարակություն
18.09.2020 | 18:34
Հայաստանի պետական սահմանից երկրի հյուսիս-արևելյան հատվածին՝ Տավուշի մարզին բաժին է ընկնում 400 կմ հատված, որից 352 կմ-ը՝ Ադրբեջանի հետ։ Հենց այս մարզի բնակավայրերի ուղղությամբ էին հուլիսյան հրետակոծությունները:
Այս ընթացքում Այգեպար, Ներքին Կարմիրաղբյուր և Չինարի գյուղերում կառուցվել են 48 տան և ավելի քան 70 կից կառույցների տանիքներ: Ներքին Կարմիրաղբյուրի գյուղապետն ընթացիկ զրույցում նշում է՝ հրետակոծություններից անկախ՝ ևս 90 տուն ունի վերանորոգման կարիք:
Տավուշի մարզպետ Հայկ Չոբանյանը նշում է՝ ոչ 90, բայց մի քանի տասնյակ տներ դեռ հերթի մեջ են:
Որոշ բնակիչներ բողոքներ ունեն․ արդեն 2 ամիս է՝ սպասում են, դեռ աշխատանքները չեն մեկնարկել: Մարզպետը, սակայն, հակադարձում է՝ աշխատանքները մեծամասշտաբ են, ովքեր ընդգրկված են ցուցակում, անպայման շուտով նրանց տներին էլ հերթը կհասնի: Իսկ ցուցակները բաց ու հասանելի են գյուղապետարաններում:
Բացի վերանորոգման աշխատանքներից՝ 2 բնակչի նոր տուն են տալու. տների դիրքը վտանգավոր է ու բաց, այդտեղ ապրել չի կարելի: Հարցին՝ այս ամենի համար ինչքան գումար է տրամադրվել պետական բյուջեից, Չոբանյանը պատասխանում է՝ որոշ հարցեր լուծվում են բարերարների փոխանցած գումարներով: Հիշեցնում է՝ հրետակոծությունների ժամանակ հաշվեհամար էր բացվել:
Բակային խաղեր, ակտիվ շինարարություն, դռնբաց տներ: Գյուղացիները կատակում են՝ գյուղի սահմանապահ լինելու մասին միայն պարբերաբար հնչող կրակոցներն են հիշեցնում: Ասում են՝ արդեն սովորական է դարձել այդ ձայներից արթնանալն ու այդ ձայների տակ ապրելը:
Անսովոր էր լրագրողների համար: Դեռ Այգեպարում էինք, երբ կրակոցներ հնչեցին։ Վայրկյանների ընթացքում Այգեպարի բակերը դատարկվեցին. վտանգն ու վախը կրակոցի ձայնից հետո է ավելի շոշափելի դառնում: Այդտեղ ու այդպես ավարտվեց մեր կանգառը։
Ճանապարհվեցինք հետ՝ Երևան, իսկ այգեպարցիները շարունակելու են ապրել ու ստեղծել՝ կրակոցից կրակոց միջակայքում բակ ու այգի դուրս գալու հնարավորությամբ:
Մանրամասները՝ տեսանյութում։
Իրինա Մկրտչյան
