22.02.2026 | 18:55
Ահազանգ է ստացվել, որ Արմավիրում գտնվող կահույքի արտադրամասում հրդեհ է բռնկվել․ ՆԳՆ
IDeA հիմնադրամը ներկայացրել է «Դիլիջանի միջմշակութային փոխանակում» ծրագրի արդյունքները
Մշակույթ
08.12.2017 | 17:19
Դեկտեմբերի 8-ին՝ UWC Դիլիջան միջազգային դպրոցում, «Հայաստանի զարգացման նախաձեռնություններ» (IDeA) հիմնադրամը ներկայացրեց «Դիլիջանի միջմշակութային փոխանակում» ծրագրի արդյունքները և Դիլիջանի թվային արխիվի ստեղծման կոնցեպտը։
«Դիլիջանի միջմշակութային փոխանակում» ծրագիրն իրականացվել է «Համագործակցություն քաղաքացիական հասարակության հետ» ծրագրի շրջանակում` IDeA հիմնադրամի աջակցությամբ և Գերմանիայի արտաքին գործերի նախարարության ֆինանսավորմամբ։
Ծրագիրը մեկն է IDeA հիմնադրամի մեծամասշտաբ նախաձեռնություններից, որոնք նպաստում են տեղական համայնքի ներգրավմամբ Դիլիջան քաղաքի վերափոխմանն ու զարգացմանը, խթանում մշակութային երկխոսությունն ու աջակցում բոլոր այն ջանքերին, որոնք ուղղված են Դիլիջանը Հայաստանի կրթական և մշակութային կենտրոն դարձնելուն։
Հայ և գերմանացի փորձագետների կողմից Դիլիջանում անցկացված չորսշաբաթյա աշխատարանի նպատակն էր հավաքագրել Դիլիջանի մասին պատմական պատշաճ փաստերն ու վկայությունները` լայն հանրությանը նորովի ներկայացնելով քաղաքի պատմությունն ու անցյալը։ Աշխատարանի արդյունքները UWC Դիլիջան դպրոցում ներկայացվեցին տեղի բնակիչներին, հասարակական և միջազգային կազմակերպությունների, դիվանագիտական կորպուսի ներկայացուցիչներին։
«IDeA հիմնադրամը բաց հարթակ է, որը համախմբում է գործընկերների, տեղական համայնքների և միջազգային շահառուների՝ երկարաժամկետ սոցիալ-տնտեսական ազդեցություն ունեցող ծրագրերի մշակման և իրագործման համար։ «Դիլիջանի միջմշակութային փոխանակում» ծրագիրը այս երեք խմբերի միջև արդյունավետ համագործակցության հիանալի օրինակ է, որի արդյունքներից կարող են օգտվել թե դիլիջանցիները, թե՛ Դիլիջանի պատմությամբ հետաքրքրվողները»,- ասաց IDeA հիմնադրամի գլխավոր տնօրեն Րաֆֆի Պաղճեանը:
IDeA հիմնադրամը հատուկ ուշադրություն է դարձնում տարածաշրջանի զարգացմանը, և ձգտում է Դիլիջանը դարձնել համաշխարհային կարգի կրթական, մշակութային, զբոսաշրջային, առողջապահական հանգույց։
«Դիլիջանի միջմշակութային փոխանակման» երկրորդ փուլը տեղի կունենա Բեռլինի ժամանակակից արվեստի ազգային պատկերասրահում՝ «Գլոբալ ռեզոնանսներ» ցուցահանդեսում։ Ցուցահանդեսին ներկայացված կլինի արվեստի աշխատանքների և ուսումնասիրությունների յուրօրինակ ընտրանի՝ ստեղծված «Դիլիջանի արվեստների դիտարան» պիլոտային միջդիսցիպլինար հետազոտական նախագծի ընթացքում, ինչպես նաև Դիլիջանի վերաբերյալ կարևոր արխիվային նյութեր։
