07.12.2025 | 12:30
Հարավ-արևմուտքից ակտիվ ցիկլոն է ներթափանցում․ հանրապետության ողջ տարածքում տեղումներ են սպասվում
Իշխան Զաքարյանն ԱԱԾ-ում մնացել է ընդամենը 40 րոպե, Գառնու տարածքների գործով կարգավիճակ չունի
Հասարակություն
15.09.2020 | 17:54
Վերահսկիչ պալատի նախկին ղեկավար, «Բարգավաճ Հայաստան» կուսակցության ղեկավար Գագիկ Ծառուկյանի նախկին թիմակից Իշխան Զաքարյանը Գառնու տարածքում Զաքարյանների հիմնած այգու գործով որևէ կարգավիճակ չունի: Այս մասին Factor.am-ի հետ զրույցում ասաց նրա պաշտպան Գեղամ Հակոբյանը:
Հիշեցնենք՝ երեկ ԱԱԾ մամուլի կենտրոնից հայտնեցին, որ տվյալ հողատարածքների ձեռքբերման օրինականությունը ստուգելու նպատակով ԱԱԾ են հրավիրվել Իշխան Զաքարյանը և գործին առնչվող այլ անձինք: Այդ անձանց թվում են Զաքարյանի որդին և եղբայրը:
Գեղամ Հակոբյանն ասաց, որ այգու հետ կապված որևէ գործ չկա, միայն նյութեր են նախապատրաստվում: Իշխան Զաքարյանն այս պահին գտնվում է Երևանի իր առանձնատանը: Այս մասին Factor.am-ի հետ զրույցում ասաց նրա հեռախոսին պատասխանած անձը, որը ներկայացավ Զաքարյանի օգնական:
«Պարոն Զաքարյանը տանն է, իրեն ԱԱԾ-ում պահել են ընդամենը 40 րոպե»,- փոխանցեց նա։
Հիշեցնենք՝ այս տարվա հունիսին ուժայիններն այցելել էին ՎՊ նախկին ղեկավարին։ ԲՀԿ առաջնորդ Գագիկ Ծառուկյանի դեմ ընտրակաշառք բաժանելու վերաբերյալ քրեական գործ հարուցելուց հետո խուզարկություններ են կատարվել նաև Զաքարյանի տանը, որը 2017-ի ընտրություններում ԲՀԿ-ի ցուցակով է անցել խորհրդարան, եղել է կուսակցության նախընտրական շտաբի ղեկավարը: Իշխան Զաքարյանի պաշտպան Գեղամ Հակոբյանի փոխանցմամբ՝ այս քրգործով նոր զարգացումներ չկան:
Ի դեպ, նախկին իշխանության օրոք ընդդիմադիր Նիկոլ Փաշինյանը Իշխան Զաքարյանից հետաքրքրվում էր, թե ինչ միջոցներով է ձեռք բերել իր շքեղ առանձնատունը: Հեղափոխությունից երկու տարի անց՝ կառուպցիայի դեմ պայքարի ֆոնին, այս հարցի պատասխանը դեռ չի տրվել:
Նարեկ Կիրակոսյան
