19.12.2025 | 23:33
ԱՄՆ-ի, Ռուսաստանի և Ուկրաինայի բանակցությունների նոր փուլը տեղի կունենա ԱՄՆ-ում առաջիկա օրերին
Տեսանյութերում և՛ դուք, և՛ ես տեսել ենք, որ կանոնները չեն պահպանվել. Մանե Գևորգյանը Դիլիջանի աղմկահարույց համերգի մասին
Հասարակություն
14.09.2020 | 19:27
Տեսանյութերում և՛ դուք, և՛ ես տեսել ենք, որ հակահամաճարակային կանոնները չեն պահպանվել։ Factor.am-ի հետ զրույցում այս մասին ասաց ՀՀ վարչապետի մամուլի խոսնակ Մանե Գևորգյանը՝ պարզաբանելով Դիլիջանում տեղի ունեցած բազմամարդ համերգն ու այդ առնչությամբ Ոստիկանության տարածած հայտարարությունը։
Հարցին՝ արդյո՞ք տնտեսական գործունեության տեսակ լինելու հանգամանքը թույլ է տալիս շրջանցել հակահամաճարակային կանոնների պահպանումը, Մանե Գևորգյանն ասաց՝ միանշանակ ոչ:
«Ոստիկանությանը ես դիմել էի՝ այդ համերգի մասին պարզաբանումներ ստանալու համար: Ըստ նրանց փոխանցած տեղեկության՝ կազմակերպիչները նախապես բոլորին ջերմաչափել են, տրամադրել դիմակներ և զգուշացրել հակահամաճարակային կանոնները պահպանելու անհրաժեշտության մասին: Համերգի ընթացքում ևս մի քանի անգամ բեմից ներկաներին հորդորել են պահպանել կանոնները, պատշաճ կրել դիմակները: Սակայն տեսանյութերում և՛ դուք, և՛ ես տեսել ենք, որ կանոնները չեն պահպանվել: Ես ևս մեկ անգամ հարցում եմ ուղարկել Ոստիկանություն՝ ճշտելու, թե կոնկրետ ինչ կանխարգելիչ միջոցառումներ են ձեռնարկել: Նաև զգուշացում են ստացել, որ ցուցաբերեն առավելագույն խստություն, որպեսզի այդ համերգը չդառնա նախադեպային ու նման բան այլևս չկրկնվի»:
Հիշեցնենք, որ սեպտեմբերի 12-ին կարանտինի կանոնների ակնհայտ խախտմամբ բազմամարդ համերգ է տեղի ունեցել Դիլիջանի քաղաքային այգում։ Հրապարակային դարձած տեսանյութերից երևում է, որ Yerevan Music Night 2020-ի մասնակիցների թիվն ակնհայտորեն գերազանցում է 60-ը, ներկա քաղաքացիներից շատերը չեն կրում պաշտպանիչ դիմակներ, չեն պահպանում սոցիալական հեռավորությունը։
Այս կապակցությամբ Ոստիկանության տարածած հայտարարությունում նշվում է, որ «Դիլիջանում տեղի ունեցած համերգը հանդիսացել է տնտեսական գործունեության տեսակ (տոմսեր են վաճառվել), ուստի վերոհիշյալ սահմանափակումներն այս դեպքի վրա չեն տարածվում: Համերգի ընթացքում ոստիկանությունը սույն որոշման պահանջների վերահսկումից բացի, կատարել է օրենքով վերապահված իր լիազորությունները՝ ձեռնարկելով կանխարգելիչ միջոցառումներ, պահպանելով հասարակական կարգը, հակահամաճարակային անվտանգության կանոնները, քաղաքացիներին բաժանվել են պաշտպանիչ դիմակներ և զգուշացվել է անվտանգության կանոնների պահպանման անձնական պատասխանատվության մասին»:
