Դատախազության մոտեցումը Անդրիաս Ղուկասյանի գործին հիշեցնում է պատիժ նրա նկատմամբ. Կարեն Մեժլումյան

Անդրիաս Ղուկասյանին պատժում են, Factor.am-ի հետ զրույցում նման տեսակետ հայտնեց Ղուկասյանի պաշտպան Կարեն Մեժլումյանը: «Անցյալ տարվա հուլիսին Սարի թաղում զանգվածային անկարգություններ կազմակերպելու և ոստիկանության գունդը գրաված «Սասնա ծռեր» զինված խմբին միանալու մտադրության մեղադրանքներով կալանավորված Անդրիաս Ղուկասյանը շարունակում է մնալ անազատության մեջ, մինչդեռ իր հետ ձերբակալված, նույն գործով մյուս մեղադրյալներն ազատության մեջ են»,- ընդգծեց փաստաբանը՝ հավելելով, որ իրենք շարունակում են մնալ նույն կարծիքին. այն է՝ Ղուկասյանի նկատմամբ իրականացվում է քաղաքական հետապնդում:

«Մինչ օրս Անդրիաս Ղուկասյանի հեռախոսազանգերի և տեսակցությունների արգելքը մնում է, այդ գործով ութ մեղադրյալներ էին, որոնցից միայն Ղուկասյանն է ճաղերի հետևում: Գործով մեղադրյալ են, բայց ազատության մեջ են, եթե նախաքննության ընթացքում քննիչը գտել էր, որ շփումները պետք է բացառվեն, հիմա ինչն է խնդիրը, մենք միջնորդություն ենք ներկայացրել, սպասում ենք պատասխանի: Դատախազության մոտեցումը, որ հատկապես Ղուկասյանին թիրախավորել են, անգամ սահամանափակումները, որ կան՝ հիշեցնում են պատիժ նրա նկատմամբ»,- ասաց նա: 

Փաստաբանը հիշեցրեց նաև, որ անգամ երբ Ղուկասյանի հայրը ծայրահեղ ծանր վիճակում էր և որդուն մեկ տարի շարունակ չէր տեսել, կրկին չթույլատրեցին, որպեսզի Ղուկասյանը տեսակցի հորը: Այժմ ընթանում են Ղուկասյանի գործով դատական նիստերը, հարցաքննվում են վկաները: «Դատավորը փաստացի Անդրիաս Ղուկասյանին արգելեց վկաների ցուցմունքների հետ կապված ցուցմունք տալ, երբ ցանկացանք հարցեր տալ, նա արգելեց: Մենք ուզում էինք վկաների հարցաքննության ընթացքում տեսանյութեր դիտել և ըստ այդմ հարցեր տալ նրանց, սակայն դատավորը չթույլատեց: Գործով նոր դատախազ է ներգրավվել, մեր բացարկի միջնորդությունն էլ մերժվել է»,- հայտնեց փաստաբանը:

Լիլիթ Շաբոյան