Սպանության մեղադրանք չկա, բայց Սահմանադրական կարգի տապալումը ենթադրում է բռնություն. դատախազ. ՏԵՍԱՆՅՈՒԹ

Երևանի ընդհանուր իրավասության դատարանի Շենգավիթի նստավայրում, դատավոր Աննա Դանիբեկյանի նախագահությամբ, ընթանում է Ռոբերտ Քոչարյանի և մյուս բարձրաստիճան պաշտոնյաների գործով դատական նիստը:

Հիշեցնենք՝ Ռոբերտ Քոչարյանի փաստաբան Հայկ Ալումյանը դատարանում հայտարարեց, թե իրենց համար անհասկանալի է՝ ինչ չափանիշով են ընտրել տուժողներին և նրանց թիվը, իսկ փաստաբան Հովհաննես Խուդոյանը կարծիք հայտնեց, որ տուժողները ոչ իրավաչափ են մասնակցություն ունեցել դատական նիստերին:

Դատախազ Գևորգ Բաղդասարյանը, անդրադառնալով քրեական գործի վարույթն անջատելու և քրեական դատավարության փուլային կառուցվածքին, տուժողի և դատավարական այլ սուբյեկտների դատավարական կարգավիճակի պահպանմանը, նշեց, որ և՛ քրեական գործերն անջատելու վերաբերյալ կարգավորումները, և՛ քրեական դատավարության փուլային կառուցվածքը դատավարական կարգավիճակների վերահաստատում չեն ենթադրում:

«Անձինք, որոնք ճանաչվել են տուժող, նրանց դատավարական կարգավիճակները չեն փոխվում»,- ընդգծեց դատախազը՝ հավելելով, որ անձը պետք է ունենա տուժողի դատավարական կարգավիճակ և հնարավորություն՝ այդ կարգավիճակով պաշտպանելու իր իրավունքներն ու օրինական շահերը:

Դատախազի դիտարկամբ՝ տուժողների դատավարական կարգավիճակի դադարեցման միջնորդությունը ուղիղ կապ ունի առաջադրված մեղադրանքում առկա բռնության հատկանիշի հետ. «Սպանության մեղադրանք չկա, բայց Սահմանադրական կարգի տապալումը ենթադրում է բռնություն»:

Մանրամասները՝ տեսանյութում: