Հասարակություն
07.09.2020 | 14:31
««Լիդիանի» նոր պահնորդական ծառայության աշխատակիցները դուրս են եկել իրենց համար հատկացված տարածքից, որտեղ հսկողություն էին իրականացնում, դուրս են եկել Ջերմուկ գնացող մայրուղի և քաղաքացուն, ուղղակի քարշ տալով դեպի «Լիդիան»-ին պատկանող տարածք, դաժան ծեծի են ենթարկել և ուշագնաց վիճակում այնտեղից հանել են»,- այս մասին ֆեյբուքյան իր էջում տեղեկացրել է Ջերմուկի բնակիչ, բնապահպան Շիրակ Բունիաթյանը:
«Նախկինները երբ հեռացան, կային կոնկրետ իրավական գնահատականներ և փաստեր, որ մարդիկ ոչ իրավաչափ ձևով էին այդտեղ աշխատանքներ իրականացնում: Հիմա այս նոր մարդիկ սկսել են նույն կերպ: Սա ցույց է տալիս, որ ով նրանց հրավիրում է աշխատանքի, դնում է պահանջ, որ ամեն գնով բացեն ճանապարհը, իսկ այդ ամեն գնովը նշանակում է բախումներ և սադրանքներ քաղաքացիների հետ: Մենք նշել ենք, որ նախկին պահնորդները ինչպես են շղթաներով հարձակվել մեզ վրա, ոնց են 50- 100 հոգով, մեկ քաղաքացու ներս քաշելով, ուղղակի զինվորական կոշիկների տակ սամասուդ են արել»,- նշում է Բունիաթյանը:
Նա հավելեց, որ իրենք սպասում են, որպեսզի դեպքն արժանանա իրավական գնահատականի․ «Ապօրինի զորքերը չեն կարող ժողովրդի հետ նման հաշվեհարդար տեսնել»։
Իր հերթին, դեպքի մասին հայտարարություն է տարածել «Լիդիան Արմենիան», նշելով, թե այդ իրենց պահնորդների վրա է հարձակում եղել և ոչ թե հակառակը․ «Սեպտեմբերի 6-ի լույս 7-ի գիշերն Ամուլսարի ճանապարհները փակող հանցավոր խմբավորումը, մոտ 10 հոգով, հավանաբար ոչ սթափ վիճակում, ներխուժել է Ամուլսարի տարածք` հայհոյելով և քարերով հարձակում գործելով «Լիդիանի» պահնորդական ծառայության վրա։ Խմբավորման անդամները սպառնացել են «Լիդիանում» աշխատող ու այդ պահին Ամուլսարի տարածքում գտնվող համայնքի բնակիչներին»։
Ընկերությունը նաև հավելել է, թե «Լիդիանի» պահնորդական ծառայությունը պաշտպանել է տարածքը օրենքի շրջանակներում իրեն վերապահված լիազորությունների շրջանակներում և այսուհետ նույնպես օրենքի սահմաններում հակազդելու է ցանկացած ոտնձգությանը։
Ոստիկանությունից էլ հայտնում են, որ Ամուլսարում այս գիշեր տեղի ունեցած միջադեպի առնչությամբ նյութեր են նախապատրաստվում։
Լիլիթ Շաբոյան
