Մարդիկ կան՝ ներկայանում են որպես լրագրող ու գումարի դիմաց զրպարտությամբ են զբաղված․ Ալեն Սիմոնյան. ՏԵՍԱՆՅՈՒԹ

ԱԺ պետաիրավական հարցերի մշտական հանձնաժողովի նիստում, ի թիվս այլ հարցերի, քննարկվում է ՀՀ քաղաքացիական օրենսգրքում փոփոխություններ կատարելու մասին օրենքի նախագիծը, որը ներկայացվել է ԱԺ փոխնախագահ Ալեն Սիմոնյանի կողմից: Նոր օրինագծով առաջարկվում է բարձրացնել զրպարտության և վիրավորանքի համար նախատեսված փոխհատուցման չափը:

ԱԺ «Լուսավոր Հայաստան» խմբակցության պատգամավոր Տարոն Սիմոնյանը նշեց՝ կիսում է մտահոգությունն առ այն, որ առկա ատելության մթնոլորտը ծայրահեղ իրավիճակ է առաջացրել, և հավելեց, որ միայն իրավական գործիքներով նման երևույթների դեմ պայքարելն այնքան էլ արդյունավետ չէ, անհրաժեշտ է նաև սոցիալական գործիքներ կիրառել, այլապես խնդիրը չի լուծվի: Նա նաև անդրադարձավ զրպարտության և վիրավորանքի դեպքում նախատեսված վերին շեմ նշելու նպատակահարմարությունը:

Ալեն Սիմոնյանը, արձագանքելով Տարոն Սիմոյանի դիտարկումներին ու հարցադրումներին, ընդգծեց, որ գումարով «սպառնալը» կարող է իր ազդեցությունն ունենալ։ «Այս պահին այլ տարբերակ չեմ տեսնում, քան պատասխանատվության աստիճանը բարձրացնելը: Կան լրագրողներ, որ բարձր մակարդակի լրատվություն են մատուցում, բայց կան նաև մարդիկ, որ ներկայանում են որպես լրագրող ու գումարի դիմաց զրպարտությամբ են զբաղված»,- նշեց նա:

ԱԺ փոխնախագահը նաև հավելեց, որ փոխհատուցման վերին շեմը ցանկալի է ավելի բարձրացնել. «Բայց փոխհատուցման չափը պետք է թողնենք դատարանի որոշմանը»:

Մանրամասները՝ տեսանյութում: