29.04.2026 | 00:57
Չեմպիոնների լիգա․ ՊՍԺ-ն գերգոլառատ խաղում հաղթեց «Բավարիային». ՏԵՍԱՆՅՈՒԹ
Գյումրիի «Երեխաների տուն» մանկատան՝ կորոնավիրուսով հիվանդ մեկ երեխայի ու աշխատակցի մոտ բարդություններ են առաջացել
03.09.2020 | 15:30
Գյումրիի «Երեխաների տուն» մանկատանը կորոնավիրուսի նոր դեպքեր չեն հայտնաբերվել, բայց բարդություններ են առաջացել մեկ աշխատակցի ու երեխայի մոտ։
Հաստատությունում հերթական թեստավորումն է իրականացվել, բարեբախտաբար, նոր դեպք չի հայտնաբերվել։ Այս մասին Factor.am-ի հետ զրույցում փոխանցեցին ՀՀ աշխատանքի ու սոցիալական հարցերի նախարարությունից։
Հիշեցնենք, որ ավելի վաղ մանկատանը կորոնավիրուսով վարակման դեպքեր էին հայտնաբերվել 6 երեխայի ու 7 աշխատակցի մոտ։ Նրանք հոսպիտալացված են Երևանի բուժհաստատություններում՝ բացառությամբ 3 աշխատակցի, որոնք ինքնամեկուսացված են։
Հիվանդներն իրենց լավ են զգում, սակայն որոշ բարդություններ են առաջացել մեկ երեխայի ու մեկ աշխատակցի մոտ։
«Երեխաներն իրենց լավ են զգում, միայն մեկ երեխայի ու աշխատակցի մոտ են որոշակի բարդություններ առաջացել։ Երեխայի մոտ տվյալ բարդությունը կապված է եղել ուղեկցող քրոնիկ հիվանդության հետ։ Հիմա նրանց վիճակը համեմատաբար կայուն է, բժիշկների հսկողության տակ են։ Մյուս երեխաներն իրենց լավ են զգում, նրանց վիճակը կայուն է»,- ասացին նախարարությունից՝ հավելելով, որ աշխատակցի մոտ ևս իրավիճակը վերահսկելի է։
Նախարարությունից նաև նշեցին, որ մյուս երեխաների ու աշխատակիցների հիվանդությունն անախտանիշ ընթացք ունի, վարակված աշխատակիցներից 4-ն էլ հիվանդանոցում խնամում են երեխաներին։
Մանկատան՝ կորոնավիրուսվ հիվանդ երեխաներն ու աշխատակիցները կրկնակի թեստավորում դեռ չեն անցել, կթեստավորվեն մոտ օրերս։
Նշենք, որ Գյումրիի «Երեխաների տուն» մանկատան երեխաները կորոնավիրուսով վարակվել էին աշխատակիցներից․ հաստատությունն աշխատում է փակ ռեժիմով, սաները ներս ու դուրս անելու հնարավորություն չեն ունեցել։
Հավելենք, որ այս հաստատության խնամքին առողջական խնդիրներ ունեցող երեխաներ են։
Էմմա Չոբանյան
